Din salasyndaǵy eń mańyzdy mindet - elimizdiń damýynyń zaiyrly qaǵidatyn qamtamasyz etý jáne nyǵaitý. Iaǵni, azamattardyń ar-ojdan bostandyǵyn buljytpai kepildendirý, onyń dindi tańdai alý nemese dinnen bas tarta alý quqyǵyn qamtamasyz etý - bizdiń zaiyrlylyq modelimizdiń ainymas negizderi retinde qala beredi.
Osy turǵydan alǵanda qoǵamymyzda berik ornyqqan konfessiiaaralyq kelisimdi odan ári nyǵaitý dini birlestiktermen birlesken jumysymyzdyń asa mańyzdy baǵyty bolyp qala beredi.
Elimizdiń din salasynyń damýy týraly tutastai túsinik qalyptastyrý úshin biz Din salasyndaǵy memlekettik saiasat týraly kontseptsiiany ázirleýdi kózdep otyrmyz. Bul qujatta memlekettiń din salasyndaǵyustanymy, strategiialyq maqsattary men jumys baǵyttaryn aiqyndaityn bolamyz.
Bul qujatty ázirleýge sarapshylardy, dintanýshylardy, azamattyq qoǵam ókilderin tarta otyryp, ony qoǵamnyń qatysýymen ashyq túrde talqylaýdy josparlap otyrmyz.
Kontseptsiia negizinde dini qyzmet týraly zańnamaǵa engiziletin ózgerister men tolyqtyrýlardy daiyndaityn bolamyz.
Uiymdastyrýshylyq jáne zańnamalyq sharalar memleket pen qoǵamnyń zaiyrlylyǵyn odan ári nyǵaitýǵa baǵyttalady. Bul dini bilim alý tártibin retteýdi, jasóspirimderdi dini qyzmetke zańsyz tartýǵa jol bermeýdi, dini ádebietterdi taratý tártibin jetildirýdi qajet etedi.
Osy oraida, menen «Din salasyndaǵy kontseptsiiany ázirleý memlekettiń dinnen bóliný qaǵidatyna qanshalyqty sáikes keledi» dep suraityndar bar.
Menińshe, munda qandai da bir qaishylyq joq, óitkeni búgingi kúnde dini birlestikter – qoǵamdyq ómirdegi shynaiylyq, azamattyq qoǵamnyń bir bóligi, al memleket olardyń qyzmet atqarýy úshin quqyqtyq jaǵdailar men orta qalyptastyrady.
Osy turǵydan alǵanda, Kontseptsiia – memleket pen dini birlestikter arasyndaǵy qatynastarǵa kózqarastar júiesi, zaiyrlylyq qaǵidatynyń tuǵyry der edim.
Din salasyndaǵy kóptegen vedomstvolardyń jumystaryn úilestirý úshin Úkimet janynda vedomstvoaralyq komissiia qurylatyn bolady.
Osy oraida Ministrlik dindi teris maqsattarǵa paidalanýǵa umtylatyn kez-kelgen áreketke jol bermeý jáne jolyn kesý úshin barlyq sharalardy qabyldaityn bolady.
Nurlan Ermekbaev,
QR Din isteri jáne azamattyq qoǵam ministri
