Foto: ashyq derekkóz
Shymkentte tanysynyń qolynan qaza tapqan 21 jastaǵy Nurai Serikbaidyń týystary áleýmettik jelide málimdeme jasap, marqumnyń buǵan deiin de kúdikti tarapynan qysym kórgenin aitty, dep habarlaidy Ult.kz.
Belgili bolǵandai, marqum Aimahan Sherhannyń ústinen buǵan deiin aryz jazǵan, alaida politsiia tarapynan tiisti baqylaý bolmaǵan.
Nurai Serikbai Almaty qalasynda «sán, dizain» mamandyǵy boiynsha bilim alǵan. Ol kúdiktimen ótken jyldyń jazynda bir toida tanysqan. Bastapqyda jigit ózin sypaiy ustaǵanymen, ýaqyt óte kele qyzǵa psihologiialyq qysym kórsetip, qorqyta bastaǵan. Týystarynyń aitýynsha, 28 jastaǵy Aimahan Sherhan qazan aiynda Nuraidy Shymkentke alyp qashqan. Keiin politsiianyń kómegimen qyz bosatylǵanymen, jigit ony ańdýyn toqtatpaǵan.
Marqumnyń jaqyndarynyń sózinshe, kúdikti Nuraidy únemi baqylap, áleýmettik jeli arqyly mazasyn alyp, qorqytý sipatyndaǵy habarlamalar joldap otyrǵan. Tipti «meni túrmege otyrǵyza almaidy» dep ashyq aitqan. Nurai bul áreketterdiń barlyǵyn dálel retinde skrinshot jasap jinaǵanymen, politsiiaǵa joldanǵan aryzdar der kezinde qaralmaǵan.
Týystarynyń aitýynsha, Aimahan Sherhan Nuraidyń sabaq kestesin bilip alyp, oqý ornyna baryp, betpe-bet qorqytqan. Qyzdyń qatty úreilengeni sonshalyq, aǵasy ony sabaqqa aparyp, qaita alyp ketýge májbúr bolǵan. Soǵan qaramastan, kúdiktige qatysty naqty shara qoldanylmaǵan.
Marqumnyń jaqyndary bul qylmystyń aldyn alýǵa bolar edi dep esepteidi. Olar Aimahan Sherhandy adam urlaý, júieli qýdalaý (stalking), qorqytý jáne adam óltirý baptary boiynsha eń qatań jazaǵa tartýdy talap etip otyr. Sondai-aq jábirlenýshiniń aryzdaryna tiisti deńgeide áreket etpegen quqyq qorǵaý organdary qyzmetkerleriniń de jaýapkershiligi qaralýy tiis ekenin aitady.
Buǵan deiin marqumnyń aǵasy Sultan Serikbai otbasynyń sot protsesiniń ádil ótetinine senim artatynyn, qazirgi tańda artyq málimdeme jasaýdan bas tartatynyn jazǵan.
Eske salaiyq, qaiǵyly oqiǵa 11 qańtar kúni keshki ýaqytta boldy. Nurai Serikbai úiinen un alý úshin syrtqa shyqqan sátte úiin torýyldap júrgen kúdikti oǵan shabýyl jasap, birneshe ret pyshaq suqqan. Aýyr jaraqat alǵan boijetken oqiǵa ornynda kóz jumdy. Qazir kúdikti qamaýǵa alynyp, is QR Qylmystyq kodeksiniń «Adam óltirý» baby boiynsha tergelip jatyr.
