Shymkentte 21 jastaǵy Nurai Serikbaidyń ólimine qatysty sot protsesi aiaqtalyp, Sherhan Aimahan ómir boiyna bas bostandyǵynan aiyryldy. Sonymen qatar sot odan jábirlenýshi taraptyń paidasyna 30 mln teńge óndirdi, dep habarlaidy ult.kz Shymkent qalasynyń sottaryna silteme jasap.
Sot málimetinshe, ol Nuraiǵa 35 ret pyshaq jaraqatyn salǵan. Alǵan aýyr jaraqattarynyń saldarynan jábirlenýshi qaza tapqan.
Sot Sherhan Aimahandy Qylmystyq kodekstiń birqatar baptary boiynsha kináli dep tanyp, qylmystardyń jiyntyǵy boiynsha ómir boiyna bas bostandyǵynan aiyrý jazasyn taǵaiyndady.
Sonymen qatar jábirlenýshi taraptyń azamattyq talap-aryzy ishinara qanaǵattandyryldy. Sottalýshydan:
- 25 mln teńge – moraldyq ziian úshin;
- 5 mln teńge – advokat qyzmetine ketken shyǵyn retinde óndirildi.
Osylaisha, jalpy 30 mln teńge ótemaqy tóleýge mindetteldi.
Sot úkimi ázirge zańdy kúshine engen joq.
Aita keteiik, marqumnyń otbasy aiyptalýshy taraptan 10 mlrd teńge kóleminde moraldyq jáne materialdyq ótemaqy talap etken edi.
