Sot otyrysynda prokýror aiyptaý aktisin jariialady, dep habarlaidy ult.kz.
Tergeý nusqasyna sáikes, er adam 21 jastaǵy Nuraidy 2025 jyldyń jazynan bastap ańdyǵan. Qazan aiynda ony Almatydan óz erkinen tys alyp ketken. Sondai-aq 7-11 qazan aralyǵynda oǵan keminde 154 ret qońyraý shalǵan.
Aiyptaý nusqasy boiynsha, 11 qańtarda kúdikti Nuraiǵa 35 jerden pyshaq suǵyp, saldarynan boijetken oqiǵa ornynda kóz jumǵan.
Eger kinási dáleldense, sottalýshyǵa ómir boiyna bas bostandyǵynan aiyrý jazasy taǵaiyndalýy múmkin. Sondai-aq jábirlenýshi taraptyń advokaty sottyń bul is boiynsha tikelei efir uiymdastyrýdan bas tartqanyn málimdedi.
Aita keteiik, qylmys qoǵamda úlken narazylyq týǵyzdy. Áleýmettik jelilerde myńdaǵan adam ádil tergeý júrgizýdi talap etti. Marqumnyń týystary alǵashqy kúnnen bastap istiń ashyq qaralýyn surap, keibir jaittardyń tolyq zerttelmegenin birneshe ret málimdedi. Olardyń aitýynsha, qylmystyń mán-jaiyn jan-jaqty tekserý qajet bolǵan.
Oqiǵadan keiin Ishki ister ministrligi qyzmettik tekserý júrgizdi. Nátijesinde Shymkent qalalyq politsiia departamentiniń birqatar basshylary qyzmetinen bosatylyp, keibir politsiia qyzmetkerlerine qatysty qylmystyq is qozǵaldy. Tergeý barysynda oqiǵa týraly habarlamalarǵa der kezinde áreket etpeý jáne qyzmettik mindetterdi tiisinshe oryndamaý faktileri tekserilgeni habarlandy.
Sonymen qatar, qoǵamda kúdiktiniń psihikalyq jaǵdaiyna qatysty máseleler de qyzý talqylandy. Tergeý barysynda oǵan sot-psihiatriialyq saraptama taǵaiyndalyp, belgili bir kezeńde arnaiy meditsinalyq mekemege ornalastyryldy. Keiin saraptama qorytyndysy boiynsha onyń qylmys jasaǵan kezde aqyl-esi durys bolǵany týraly málimet jariialandy.
