Nur-Sultan qalasynyń ákimi búgingi jol-kólik oqiǵasynan qaitys bolǵandardyń otbasyna jáne zardap shekkenderge jan-jaqty kómek kórsetýdi tapsyrdy, dep habarlady qala ákimdiginiń resmi saity.
"Qaitys bolǵan jandardyń týǵan-týystaryna ákimdik atynan jáne óz atymnan qaiǵyra kóńil aitamyn. Búgingi apat saldarynan eki adam qaitys bolyp, 36 adam túrli jaraqat alǵan. Qazir olar meditsinalyq kómek alýda", - dedi Baqyt Sultanov ákimdikte ótken jinalysta.
Osy oraida ákim búgingi jol-kólik oqiǵasynan qaitys bolǵandardyń otbasyna, zardap shekkenderge jan-jaqty kómek kórsetýdi jáne jol apatynyń sebebin anyqtaýdy tapsyrdy.
Qalalyq qoǵamdyq densaýlyq saqtaý basqarma basshysy Qamaljan Nadyrovtyń aitýynsha, oqiǵa ornynda jedel járdemniń 19 brigadasy jumys istep jatyr. Barlyǵy 36 adam zardap shekken, eki adam qaitys bolyp, 26 adam aýrýhanaǵa jatqyzylǵan. Qazir úsh adamǵa operatsiia jasalýda, taǵy tórt adam daiyndalýda. Olardyń qatarynda 1983 jyly týǵan Filippin eliniń azamaty bar, onyń jaǵdaiy aýyr. Aldyn ala diagnozy: "Keýde qýysy jaraqattanǵan jáne jambasy synǵan". Zardap shegýshilermen psihologtar jumys isteýde", – dedi Q.Nadyrov.
Jol patyna jedel járdem kóligi de túsken. Onyń ishinde eki feldsher men júrgizýshi bolǵan. Júrgizýshi din aman. Al bir feldsher jabyq bas súiek-mi jaraqatymen birinshi qalalyq aýrýhanaǵa jetkizilgen.
Búgin Uly dala kóshesi men Qabanbai batyr dańǵyly qiylysynda úsh avtobýs pen jeńil kólikter jol apatyna ushyrady. Qala mańyna qatynaityn № 303 baǵdardaǵy avtobýs № 12 avtobýsymen soqtyǵysqan bolatyn.
