Tótenshe jaǵdai rejiminen keiin jumysyn qashan bastaityny aiqyndalatyn elordalyq balabaqshalarda kezekshi toptardyń rejim algoritmi bekitilmek, dep habarlaidy QazAqparat.
Nur-Sultan qalalyq bilim basqarmasynyń basshysy Sholpan Qadyrovanyń aitýynsha, osy jyldyń 18 naýryzynan bastap elordadaǵy mektepke deiingi bilim berý uiymdarynyń bári menshik nysanyna qaramastan qyzmetin toqtatqan. Jalpy astanada 55 708 bala bar ártúrli úlgidegi 377 mektepke deiingi uiym jumys isteidi.
«Balabaqsha qyzmetkerleri men meńgerýshilerine óz qalaýy boiynsha aqyly eńbek demalysy berildi. Menshik nysanyna qaramastan barlyq mektepke deiingi uiym tótenshe jaǵdai kezeńinde memlekettik tapsyrys boiynsha qarjylandyrýmen tolyq qamtamasyz etilgen. Mektep jasyna jetken balalardy balabaqshadan shyǵarý jyl saiyn 1 tamyzǵa deiin, sondai-aq balalardy jas erekshelikterine bailanysty bir toptan kelesi topqa aýystyrý osy jylǵy 1-31 tamyz aralyǵynda júzege asyrylady. Sonymen qatar, Qazaqstanda tótenshe jaǵdai rejimi men karantin engizilýine bailanysty mektepke deiingi uiymdardyń qyzmeti tótenshe jaǵdai rejimi aiaqtalǵanǵa deiin toqtatyldy», - dedi Sholpan Qadyrova búgin ótken baspasóz máslihatynda.
Basqarma mektepke deiingi uiymdardaǵy bosaǵan oryndar men túlekterdiń sanyna monitoring júrgizip otyr. Jinaqtaý merzimi týraly sheshim tótenshe jaǵdai rejimi alynǵannan keiin qabyldanady.
«Mektepke deiingi uiymdar óz jumysyn bastaý úshin Densaýlyq saqtaý ministrligi nysandardy paidalanýǵa berý tártibi men erejelerin ázirleýde. Bul qujatta nysandarda sanitarlyq-dezinfektsiialyq rejimdi saqtaý normalary, sondai-aq mektepke deiingi balalar uiymdarynyń kezekshi toptarynyń rejim algoritmi kórsetiledi. Balabaqshalardyń naqty qai ýaqytta jumysyn bastaityny tótenshe jaǵdai aiaqtalǵannan keiin belgili bolady», - deidi ol.
