Elorda ákimi Baqyt Sultanov pen QR densaýlyq saqtaý ministri Eljan Birtanov jol-kólik oqiǵasynda zardap shekkenderdiń jaǵdaiyn bilip qaitty, dep habarlaidy Sputnik Elorda Aqparat agenttigine silteme jasap.
Úsh naýqastyń jaǵdaiy óte aýyr. Olar jasandy tynys alý apparatyna qosylǵan.
"Ókinishke qarai, bir naýqastyń oń aiaǵyn kesýge týra keldi. Sol aiaǵy da synǵan. Keiin oǵan metallosintez jasaýdy josparlap otyrmyz. Aman alyp qalamyz dep senemin. Ekinshi áieldi emdeýge de bar kúshimizdi salyp jatyrmyz. Ázirge aiaǵyn kespei, metalmen bekitip qoidyq. Olar, árine, jaraqat bóliminde uzaq ýaqyt boiy emdeletin bolady", - deidi №2 kópbeiindi qalalyq aýrýhananyń bas dárigeri Ivan Li.
Aita ketsek, ekinshi qalalyq aýrýhanaǵa 29 adam túsken. Olardyń on tórti ambýlatoriialyq em aldy. Zardap shekkenderge meditsinalyq jáne bastapqy hirýrgiialyq kómek kórsetilip, úilerine jiberildi.
"Qazir 1 adam statsionarda em alyp jatyr. Olardyń segizi túrli dárejedegi jaraqatpen travmotologiia bólimine jiberildi. Úsheýi jan saqtaý bóliminde jáne eki naýqas hirýrgiia bóliminde", - dedi Ivan Li.
Onyń aitýynsha, birinshi kúni bes adamǵa shuǵyl ota jasalǵan. Bir naýqastyń aiaǵy kesilip, ózge zardap shegýshilerdiń synǵan aiaqtary ornyna keltirildi. Taǵy da qosymsha ota jasaý josparlanyp otyr.
"Bir áielge laparotomiia jasadyq. Qazir barlyq naýqastardyń jaǵdaiy qanaǵattanarlyq. Adam ólimi bolǵan joq. Barlyq zardap shekkenderge kómek kórsetildi. Bárin aman alyp qalamyz dep senemin. Bir naýqastyń jaǵdaiy óte aýyr boldy. Qazir de óte aýyr, biraq turaqty jaǵdaida", - dedi Ivan Li.
Eske sala ketsek, 26 naýryzda Nur-Sultan qalasyndaǵy Uly Dala kóshesi men Qabanbai batyr dańǵyly qiylysynda jantúrshigerlik jol apaty boldy. Úsh avtobýs soqtyǵysyp, birneshe avtokólikke, sonyń ishinde jedel járdem kóligine de zaqym keldi. Apat saldarynan 1966 jyly týǵan avtobýs júrgizýshisi men 26 jastaǵy jolaýshy kóz jumdy.
Jol apatynan qaitys bolǵan Aizat Núrekenova - Qaraǵandy oblysynyń turǵyny. Jalǵyzbasty ananyń artynda kámelettik jasqa tolmaǵan bir balasy qaldy. Al júrgizýshi Abai Ospanov tórt balanyń ákesi edi.
