Nur-Sultandaǵy 35 kóp balaly otbasy Pavlodar oblysynyń Ekibastuz qalasyna kóshirildi. Olarǵa baspana men jumys berilgeni aitylady. Bul týraly astananyń turǵyn úi qory direktory Nursulý Qojahmetova habarlady, dep jazady Azattyq.
Qojahmetovanyń sózinshe, Pavlodar oblysynyń ákimdigi kóp balaly shańyraqtarǵa kómektesýge ázir ekenin aityp, usynys jasaǵan soń mamyrdyń basynda Nur-Sultannan Ekibastuzǵa 18 shańyraq kóshken. "Nurly Ertis" dep atalatyn baǵdarlama aiasynda kóship barǵandarǵa jańa salynǵan turǵyn úiden úsh bólmeli páter berilgen. Ákimdik jumysqa jaramdy adamdarǵa qyzmet usynyp, balalardy mektepke, balabaqshaǵa ornalastyrýǵaǵa kómektespek.
— Olarǵa bir jyl boiy kómek bolady. Iaǵni, kommýnaldyq qyzmet pen jaldaý aqysyn ákimdik túgel ózi kótermek. Qazir kóshkisi keletin otbasylarmen sóilesip jatyrmyz. Ekibastuz ákimdigi bizdiń úsh-tórt balasy bar otbasylarǵa da kómektesý týraly usynysymyzdy qabyl aldy. Olarǵa eki bólmeli páterler berilmek, — dedi Nursulý Qojahmetova.
Aqpan aiynda Nur-Sultanda (sol kezdegi - Astana) bir otbasynyń bes balasy órtten qaza tapqan soń kóp balaly analar narazylyq tanytyp, bilikten járdemaqy ósirýdi talap etken. 27 aqpanda ótken "Nur Otan" partiiasynyń sezinde sol kezdegi prezident Nursultan Nazarbaev úkimetke ár balaǵa sáýirden bastap 21 myń teńge berýdi tapsyrǵan. Bul tapsyrma negizinde parlament ázirlegen zańǵa qazirgi prezident Qasym-Jomart Toqaev sáýirdiń basynda qol qoiǵan.
