Foto: Tengrinews.kz/Turar Qazanǵapov
Nur-Sultandaǵy arnaiy HQKO ǵimaraty mańynda reseilik nómirmen júrgen kólik ieleri narazylyqqa shyqty. Olar Ishki ister ministrligi tekserýlerine narazy, - dep habarlaidy Tengrinews.kz tilshisi.
Elordalyq arnaiy HQKO ǵimaratyna saǵat 13.00-de júzge jýyq júrgizýshi jinalǵan. Olardyń bári - Reseide tirkelgen kólik ieleri. Alaida olardyń kóbi kóligin Qazaqstanda satyp alǵan.
"Men bir jyl buryn kólik satyp alǵanmyn. Reseilik, róli oń jaqta. Tirkeý kýáligin, saqtandyrýdy osy jaqta jasattym. Bulai bolaryn bilgen joqpyz. Shekaradan ótkizgende, róli oń jaqta ekenin kórdi. Kóliktiń bárin aiyp turaǵyna ala berý sheshim emes. Kóbiniń nesiesi bar. Aiyp turaqtarynyń qaisyn qaramasańyz, reseilik kólikter tolyp tur. Ne isteý keregin bilmeimiz", - dedi narazylqqa shyqqan júrgizýshilerdiń biri.
Ol Toyota Alphard kóligin 3,8 millionǵa satyp alǵanyn aitty. Qazaqstanda oń jaq róldi kólikter tirkeýge jatpaidy, sondyqtan kólikti bólshekteýge ǵana usynýǵa bolady.
Ol byltyr reseilik kólikterdi júrgizýge tyiym salynǵanyn estigenin moiyndady. Biraq sodan keiin WhatsApp jelisinde júrgizýshilerge oń jaq róldi kólikter shekaradan esh qiyndyqsyz ótetini, iaǵni alańdaýdyń qajeti joq ekeni aityldy. Kóp adam sol habarlamaǵa sengen, óitkeni olar qoljetimdi baǵaǵa sapaly avtokólik alǵysy keledi.
"Men kólikti bir jyl buryn satyp aldym. Bul meniń jalǵyz kóligim, negizgi tabys kózim. Balalarymdy mektepke aparamyn", - dep shaǵymdandy astanalyq Ardaq.
Ol Honda kóligin 2 millionǵa satyp alǵanyn, ony tirkeý úshin qaita óńdeý aqysy 3 millionǵa jýyqtaitynyn aitty. Múgedektigi bar er adamnyń ondai aqshasy joq, kóliksiz múlde kún kórissiz qalady.
"Qazaqstanda mundai somaǵa kólik satyp alý múmkin emes. Eki millionǵa eski, 25 jyl qoldanylǵan kólikti ǵana satyp alýǵa bolady. Men salyq tóleýden bas tartpaimyn. Bul kólik otbasymdy asyrap otyrǵan negizgi tabys", - dedi Ardaq.
Jarty saǵattan keiin narazylyq bildirýshiler ákimshilik politsiia ǵimaraty aldyna barǵan. Olarǵa Nur-Sultan qalalyq IIB ókili, politsiia podpolkovnigi Eljan Chýbekov shyqty.
"Kólik basqa memlekette tirkelgen bolsa, kedendik rásimdeýden ótý kerek. Memlekettik baj salyǵyn tóleńiz. Árkimniń jaǵdaiy ártúrli. Sol jaq róldi kólikter bizge tirkele alady, al oń jaq róldi kólikter ókinishke qarai, joq", - dedi Chýbekov.
Eki saǵatqa jýyq ýaqytqa sozylǵan jiynnan keiin turǵyndar qaitadan kóshege shyqty.
