Jyl basynan beri elordada turmystyq qylmys úshin 900 adam jaýapqa tartyldy, dep habarlaidy QazAqparat.
Bul týraly Nur-Sultan qalasy Politsiia departamenti Áielderdi zorlyq-zombylyqtan qorǵaý bólimshesiniń aǵa inspektory Gúlmira Shrahmetova aityp berdi.
«Jyl basynan beri 9 aida qylmystardyń tirkelý sany 37,1 paiyzǵa tómendegenin baiqadyq. Is júzinde barlyq túrler boiynsha qylmystardyń tómendeýi baiqalady. Profilaktikalyq jumysty kúsheitý nátijesinde qoǵamdyq oryndardaǵy qylmys – 53,9 paiyzǵa, kóshelerde – 53,7 paiyzǵa, mas kúiinde qylmys jasaý – 37,7 paiyzǵa tómendegen. 10 myń turǵynǵa shaqqanda qylmys deńgeii 40,2% azaiǵan. Alaida, jasalǵan barlyq sharalarǵa qaramastan otbasylyq-turmystyq qylmystar 4 paiyzǵa artqan», - dedi G. Shrahmetova Politsiia departamentinde ótken baspasóz máslihatynda.
Onyń aitýynsha, kóp jaǵdaida áielder tán jaraqaty boiynsha politsiiaǵa júginedi.
«Pandemiia jaǵdaiynda halyqtyń ómir salty túbegeili ózgerdi, áleýmettik qarym-qatynas azaiyp, materialdyq jaǵdaidyń nasharlaýy adamdardyń psihologiialyq jaǵdaiyna teris áser etti. Ishimdik ishý saldarynan otbasylyq shielenister týyndady. Biz esepke alynǵan adamdarmen – maskúnemder (1009 adam), nashaqorlar (370 adam), otbasylyq janjal shyǵarýshylarmen (5917 adam) profilaktikany kúsheittik. Alkogol men esirtkige táýeldilikten májbúrlep emdeý jumystaryn jalǵastyrýdamyz», - dep túsindirdi departament ókili.
Departament málimetterine sáikes, turmystyq qylmys úshin 920 adam jaýapqa tartylǵan.
«Jábir kórgenderdi qorǵaý úshin 5 917 nusqama shyǵaryldy. 260 áiel daǵdarys ortalyqtaryna ornalastyryldy. Qorǵaý talaptaryn buzǵany úshin 147 adam jazalandy», - deidi G. Shrahmetova.
