QR Indýstriia jáne infraqurylymdyq damý ministrliginiń Azamattyq aviatsiia komiteti Qazaq Air áýe kompaniiasynyń ushaǵyna qatysty bolǵan oqiǵanyń mán-jaiyn jariia etti, dep habarlaidy "Ult aqparat".
«12 aqpanda saǵat túngi 23.20-da elordada Qazaq Air áýe kompaniiasynyń Nur-Sultan – Shymkent baǵytyndaǵy QAZ427 reisinde tosyn oqiǵa tirkeldi. Ushaqtyń ortańǵy shassiiniń tysy jarylyp, onymen ushaq 700 metrdei qozǵalyp úlgergen. Osydan soń áýe kemesi turaqqa jetkizilgen», - delingen komitet taratqan habarlamada.
Búgin tańerteń mamandar Nur-Sultan – Almaty baǵytyndaǵy QAZ353 turaqty reisin oryndaityn Qazaq Air áýe kompaniiasynyń basqa áýe kemesin de tekseripti. Sonda shassidiń oń jaq tireýiniń qos pnevmatiginiń de zaqymdanǵany anyqtalǵan. Osydan soń ushaqtan jolaýshylardyń bári de evakýtsiialanǵan.
Qazirgi ýaqytta QR IIDM aviatsiialyq oqiǵalar men jaǵdailar basqarmasy bul jailarǵa bailanysty tergeý júrgizýde.
