Nur-Sultan qalasy bas sanitar dárigeriniń jańa qaýlysy shyqty, dep habarlaidy "Ult aqparat".
Qaýlyda buqaralyq is-sharalardy, aýyzashar, banket, úilený toiy, mereitoi, eske alý siiaqty otbasylyq is-sharalardy ótkizýge, sondai-aq, mitingi, sherý, jiyndar ótkizýge tyiym salynǵan.
Tek Ashyq jobasyna qatysatyn nysandarda 30 adamnan aspaityn sharalar ótkizýge ruqsat etilgen.
Al Ashyq jobasyna qatyspaityn obektilerdi qospaǵanda boýling-ortalyqtarǵa, kompiýterlik klýbtarǵa, kinoteatrlar, biliard, karaoke, kinorýmdar, batýttar, túngi klýbtar, býkmekerlik keńseler men oiyn klýbtary, jabyq ǵimarattaǵy lotereialar, balalardyń oiyn ortalyqtary, oiyn bólmeleri, oiyn alańdary men attraktsiondar, sporttyq nysandardan tys ornalasqan muz jáne rolikti muz aidyndaryna barýǵa tyiym salynyp otyr.
«Qoǵamdyq oryndarǵa, onyń ishinde qalalyq qoǵamdyq kólikterge, qyzmetine ruqsat etilgen obektilerge barǵan kezde, sondai-aq qoǵamdyq oryndarda ashyq aýada bolǵan kezde (ashyq aýada sportpen shuǵyldaný kezinde jáne 5 jasqa deiingi balalardy qospaǵanda) betperde kiiý, qashyqtyqty saqtaý jáne antiseptikterdi paidalaný jónindegi talaptardy qatań saqtalsyn. Áleýmettik qashyqtyqty mindetti túrde 2 metrden kem emes saqtai otyryp, jeke jáne toppen ashyq aýada sporttyq jattyǵýlar ótkizýge ruqsat berilsin» dep jazylǵan qaýlyda.
