Ustazdar kúni qarsańynda «Nur Otan» partiiasy Tóraǵasynyń Birinshi orynbasary Astana qalasyndaǵy №83 mektep-gimnaziiaǵa arnaiy baryp, elordalyq muǵalimderdi kásibi merekelerimen quttyqtady, dep habarlaidy "Ult aqparat".
Óz sózinde Máýlen Áshimbaev kez kelgen adam úshin ustazdyń orny erekshe ekenine toqtaldy.
– Barlyq jetistiktiń bastaýynda oqý men toqýǵa úiretip, bilimge baýlyǵan ustazdar turady. Sondyqtan ár adam ata-anasymen birge ustazyna da qaryzdar, – dedi Máýlen Áshimbaev.
Partiia Tóraǵasynyń Birinshi orynbasary elimizdi jańǵyrtý jolynda muǵalimderdiń erekshe ról atqaratynyn da aitty.
– Elbasynyń Qazaqstandy úshinshi jańǵyrtý bastamasynda kórsetilgen mindetterdi oryndaýdyń birden bir joly jańa úrdisterge sai, sapaly bilim berý ekeni sózsiz. Osy turǵydan kelgende, ustaz eńbeginiń mańyzy joǵary. Jastarymyzdyń patriot, bilikti de básekege qabiletti maman jáne týǵan elge qyzmet etetin azamat bolyp qalyptasýyna da muǵalimderdiń qosatyn úlesi zor. Óitkeni ustaz – bilim berý isiniń altyn qazyǵy, – dedi Máýlen Áshimbaev.
Sonymen qatar kezdesý barysynda ustazdardyń partiia úshin róli erekshe ekeni, muǵalimderdiń Elbasy men partiianyń barlyq bastamalaryn nátijeli oryndap, olardyń máni men mańyzyn halyqqa túsindirýge úlken úles qosyp kele jatqany aityldy. Odan bólek, «Nur Otannyń» bilim berý isin jandandyrýǵa jáne jastarymyzdyń bolashaqtyń mamandyqtaryn igerýine baǵyttalǵan jańa jobalary da sóz boldy.
Osy rette, atalǵan mekteptiń inkliýzivti bilim berý isin damytyp otyrǵanyn airyqsha atap ótken jón. Iaǵni munda erekshe talaptardy qajet etetin balalardyń sapaly bilim alýyna barlyq jaǵdai jasalǵan. Máýlen Áshimbaev inkliýzivti bilim berý qoldaýǵa laiyq igi is ekenine nazar aýdaryp, «Kedergisiz keleshek» jobasy aiasynda bul baǵytta partiia tarapynan da aýqymdy jumystar atqarylyp jatqanyn jetkizdi.
Óz kezeginde ustazdar qaýymy mereke qarsańynda alǵashqylardyń biri bolyp quttyqtaǵan «Nur Otan» partiiasyna erekshe rizashylyǵyn bildirip, alǵystaryn jetkizdi.
