Osydan týra bir apta buryn elimizde «Nur Otan»-nyń partiiaishilik irikteýi - praimerizge qatysý úshin ótinishter qabyldaý bastaldy, dep habarlaidy "Ult aqparat".
Partiia Lideri Nursultan Nazarbaevtyń tapsyrmasymen «Nur Otan» praimerizi elimizdiń partiialyq-saiasi damý tarihynda tuńǵysh ret respýblikalyq partiiaishilik sailaý aýqymynda ótedi.
Partiia Tóraǵasynyń birinshi orynbasary Baýyrjan Baibek, bul – Elbasynyń bastamasymen qolǵa alynǵan «Senim. Dialog. Bolashaqqa nyq qadam» partiia jumysyn «qaita jandandyrý» baǵdarlamasynyń qorytyndy kezeńderiniń biri ekenin aitqan bolatyn. Praimerizdiń negizgi maqsaty – aldaǵy Májilis pen barlyq deńgeidegi máslihat sailaýlaryna partiialyq tizimderdi qalyptastyrý úshin básekeles kúres negizinde jańa kóshbasshylardy aiqyndaý.
Partiia baspasóz qyzmetiniń habarlaýynsha, bir apta ishinde praimerizge qatysýǵa 7000-ǵa jýyq adam ótinish bergen. Olardyń 34%-y – áielder, onyń ishinde 100-i – kópbalaly ana, . 24%-y – 35 jasqa deiingi jastar. Sondai-aq 51-i – erekshe qajettiligi bar azamat. Bastaýysh partiia uiymdary arqyly 2419 adam usynylsa, 4496 kandidat – ózin-ózi usynǵandar.
Solardyń biri - «Temeki tútininen azat Qazaqstan úshin» qoǵamdyq qozǵalysynyń basshysy Jámilá Sadyqova. Áleýmettik jelilerdegi paraqshasynda ol óziniń densaýlyq saqtaý salasyndaǵy bilimin azamattardyń ómir súrý sapasyn jaqsartýǵa paidalaný úshin praimerizge qatysatynyn aitty.
«Aitarym ǵana emes, atqarsam degen isterim de jeterlik. Óz elimde deklarativti emes, naqty, sapaly ózgerister jasaǵym keledi. Qazaqstandyqtardyń densaýlyǵyn saqtaý úshin temekige qarsy bastamalar men sharalardy qolǵa alǵanym siiaqty bar kúsh-jigerimdi salyp jumys isteýge, óz úlesimdi qosýǵa daiynmyn», - dep jazdy Jámilá Sadyqova.
Al almatylyq kásipker, qoǵam belsendisi Konstantin Avershin sybailas jemqorlyq máselesine alańdaýshylyq bildirdi.
Onyń pikirinshe, sybailas jemqorlyq – densaýlyq saqtaý nemese bilim berý júiesindegi kez kelgen olqylyqtyń negizgi sebebi. Sonymen qatar, ol praimeriz – qatań básekelestik negizde eń myqty kandidattardy irikteýge jaǵdai jasaityn erekshe múmkindik ekenin atap ótti.
«Bastaýysh partiia uiymynyń atynan túsesiń be, álde óz-ózińdi usynasyń ba, ol jaǵy mańyzdy emes. Dál qazir eń bastysy – óz qabiletińdi, atqara alatyn isińdi kórsetý. «Nur Otan» partiiasyn qaita jandandyrý júrip jatyr. Bul jai ǵana aityp qoia salý emes, praimerizge jumys isteýge jáne ózgeris jasaýǵa daiyn adamdar qatysady»,-dep túidi Konstantin Avershin.
Erekshe qajettiligi bar adamdar úshin qalalyq ortany yńǵaily etý máselelerin voleiboldan Qazaqstan paralimpiadalyq jastar quramasynyń kapitany Serik Esmatov kótermek.
«Men múmkindigi shekteýli adammyn, sondyqtan ózim siiaqty jandardyń qandai qiyndyqtarmen ushyrasatynyn jaqsy bilemin. Osy turǵydan tek týǵan qalamdaǵy emes, búkil Qazaqstandaǵy jaǵdaidy jaqsartsam degen josparym bar», - dedi sportshy.
Eriktiler ligasynyń basshysy Aisulý Erniiazova ókildik organdarda jastardyń múddesin bildirýge talpynyp otyr. Aisulýdyń aitýynsha, partiianyń jastarǵa senim artýy, olarǵa jaýapkershilik júkteidi.
«Praimeriz – eń aldymen jańa tarihty jasaityn jigerli tulǵalar men jańa tolqyn. Men muny partiianyń taktikalyq jáne strategiialyq durys sheshimi dep esepteimin. Kúres óte qyzyqty básekelestik jaǵdaida ótedi. Jas býynnyń múddesin kózdei otyryp, memlekettik jastar saiasatyn basty nazarda ustaimyn. Qandai ózgeristerdiń jastarǵa keregin jáne qandai máselelerdiń alańdatatynyn jaqsy bilemin», - dedi kandidat.
Al jalǵyzbasty analardy qoldaý máselesin Pavlodardan kelgen Jámilá Ernazarova qolǵa almaq.
«Praimerizge qatysýdaǵy maqsatym – pavlodarlyq otbasylarǵa, eń aldymen kámeletke tolmaǵan balalary bar jalǵyzbasty analarǵa odan ári júieli qoldaý kórsetý», - dedi ol.
Tanymal shoýmen Tursynbek Qabatov ta praimerizge qyzyǵýshylyq tanytyp otyr. Ol Instagram jelisindegi oqyrmandaryna partiiaishilik irikteýge qatysqanym jón be degen oi tastap, olardyń pikirlerin surady. Aita ketý kerek, Tursynbek Qabatov ótken jyldyń qarasha aiynan beri «Nur Otan» partiiasynyń múshesi. Onyń bastamasyn kópshilik qoldady.
Bileýshi partiianyń baspasóz qyzmeti taratqan aqparatqa sáikes, praimerizge qatysý úshin ótinishti https://primaries.kz/ saitynda «Praimeriz» aqparattyq júiesi arqyly onlain joldaýǵa nemese aýmaqtyq uiymdastyrý komitetterine jeke ótinish berýge bolady. Kandidattardy usyný jáne tirkeý 28 tamyzǵa (qosa eseptegende) deiin jalǵasady.
Partiia qundylyqtaryn ustanatyn jáne sailaý quqyǵy bar kez kelgen azamat úmitker bola alady. Ol úshin praimerizge qatysýshylardy tirkeý merzimi aiaqtalǵanǵa deiin «Nur Otan»-nyń qataryna qosylý kerek.
Praimeriz ótkizý, sondai-aq kandidattarǵa uiymdastyrýshylyq jáne quqyqtyq qoldaý máseleleri boiynsha «Nur Otan» partiiasy 8 (800) 080 4441 arnaiy jedel jelini iske qosty.
