XX sez qarsańynda partiianyń Ortalyq apparatynda «Nur Otan» Saiasi keńesiniń otyrysy ótti. Beinekonferentsiia bailanysy rejiminde uiymdastyrý máselelerimen qatar partiianyń sońǵy 5 jyldaǵy qyzmetiniń qorytyndylary qaraldy, dep habarlaidy QazAqparat partiianyń baspasóz qyzmetine silteme jasap.
«Nur Otan»-nyń besjyldyq jumysyn qorytyndylai kele, partiia Tóraǵasynyń birinshi orynbasary Baýyrjan Baibek partiianyń 234 qoǵamdyq qabyldaý bólmesi sailaýaldy baǵdarlamany baqylaý men «keri bailanystyń» pármendi tetigi bolǵanyn atap ótti.
Elbasy, partiia lideri Nursultan Nazarbaevtyń tapsyrmasy boiynsha «Nur Otan» 2014 jyly elimizde birinshi bolyp «Elektrondy partiia» jobasy aiasynda qoǵamdyq onlain-qabyldaý bólmesin, veb-portal ashyp, messendjerler men áleýmettik jeliler arqyly kommýnikatsiianyń jańa arnalaryn engize bastaǵan.
«5 jyl ishinde partiiaǵa shamamen 1,2 mln adam júgindi, onyń 30%-i ótinishin onlain joldady. Ótinishterdiń 92%-i boiynsha oń sheshim qabyldanyp, tegin keńes berilip, quqyqtyq kómek kórsetildi. Nurotandyq depýtattar, ortalyq jáne jergilikti atqarýshy organdardyń basshylary 180 myńǵa jýyq qabyldaý ótkizip, 340 myńnan astam azamatty qabyldady. Ótinishterdiń 72%-i oń sheshimin tapty, 28%-i boiynsha túsindirme men qajetti keńes berildi», - dedi Baýyrjan Baibek.
Onyń aitýynsha, pandemiiaǵa qaramastan, qoǵamdyq qabyldaýlardyń jumysy onlain formatta jalǵasyp, elektrondy túrde 339 myń ótinish qabyldanǵan.
«Álemdik tájiribe kórsetkendei, pandemiia kezinde turmystyq zorlyq-zombylyq ósýde. Qiyn-qystaý jaǵdaiǵa tap bolǵan otbasylarǵa, áielder men balalarǵa keshendi kómek kórsetýdi uiymdastyrý úshin táýlik boiy jumys isteitin «111 shuǵyl qyzmet» bailanys ortalyǵy iske qosyldy. 2 aidyń ishinde 3 myńnan astam ótinish boiynsha zań keńesteri berilip, psihologiialyq kómek kórsetildi. Bul – el Prezidenti Qasym-Jomart Kemeluly Toqaevtyń «Halyq únine qulaq asatyn memleket» tujyrymdamasyn júieli júzege asyrýdyń kórinisi», - dedi partiia Tóraǵasynyń birinshi orynbasary.
Osy oraida, ol Elbasy, partiia Tóraǵasy Nursultan Nazarbaevtyń tapsyrmasyna sáikes, «Nur Otan» partiiasy naqty áleýmettik toptardyń máselelerin jobalyq tásil negizinde sheshetinin atap ótti.
Máselen, «Ardagerlerdi ardaqtaiyq» jobasyn júzege asyra otyryp, ardagerler men tyl eńbekkerleriniń 200 myńnan astam áleýmettik-turmystyq máseleleri sheshildi. «Baqytty otbasy» jobasy aiasynda 1300-den astam bilim berý, densaýlyq saqtaý jáne áleýmettik qorǵaý mekemelerine monitoring júrgizildi, bala quqyqtaryn qorǵaý jáne turmystyq zorlyq-zombylyqqa qarsy turý turǵysynan zań jobalaryna 45 usynys engizildi.
«Kedergisiz keleshek» jobasynyń arqasynda erekshe qajettilikteri bar 40 myńǵa jýyq azamat jumysqa ornalastyrylyp, 24 myńnan astam nysan solarǵa yńǵailandyryldy. Sondai-aq, jalpy bilim beretin mektepterde 43 inkliýziiany qoldaý kabineti ashyldy.
«Elbasy, partiia Lideri N.Á. Nazarbaev qoiǵan mindetterdiń sheshilýin, alynǵan mindettemelerdiń oryndalýyn baqylaýdy Partiialyq baqylaý komiteti men Sybailas jemqorlyqqa qarsy is-qimyl jónindegi respýblikalyq qoǵamdyq keńes iske asyrady. Sońǵy 5 jyl ishinde partiialyq basty organdar túrli memlekettik jáne partiialyq organdarǵa 800-den astam usynym ázirledi. Máselen, Partiialyq baqylaý komitetiniń aralasýymen 9,3 myń meditsina qyzmetkerine ótemaqy tólendi», – dep atap ótti Baýyrjan Baibek.
Sybailas jemqorlyqqa qarsy kúres te partiia úshin printsipti másele bolyp qala beredi. Sybailas jemqorlyqqa qarsy is-qimyl jónindegi respýblikalyq keńes «Jas Otan» Jastar qanatymen birlesip joǵary oqý oryndary men kolledjderdi tekserdi. Nátijesinde 10 myńnan astam stýdenttiń jataqhanalardaǵy ómir súrý jaǵdaiy jaqsardy.
«Jastar – Otanǵa!» baǵdarlamasy aiasynda sońǵy 5 jylda 13 myńnan astam jas býyn jumysqa turdy. Jastar bastamalarynyń memlekettik áleýmettik tapsyrysyn qarjylandyrý 2,5 ese ósti.
«Nur Otan» partiiasy qoǵamdyq-saiasi uiymdardyń ishinen alǵashqylardyń biri bolyp pandemiianyń áleýmettik-ekonomikalyq saldaryna qarsy turdy. Elbasy, «Nur Otan» partiiasy Tóraǵasynyń bastamasymen qurylǵan «Birgemiz» qoǵamdyq qory 2,2 milionnan astam adamǵa, Nur-Sultan men Almaty qalasyndaǵy 2 myńnan astam meditsina qyzmetkerine materialdyq kómek kórsetti. Halyqtyń neǵurlym az qorǵalǵan toptaryna jatatyn 100 myń otbasyna 5 mln. meditsinalyq maska tegin taratyldy. 1 mln-nan astam adam 4,4 mlrd teńge somaǵa birinshi kezekte qajetti taýarlarmen qamtamasyz etildi. Maqtaaralda sý tasqynynan zardap shekken azamattarǵa arnap 32 úi salynyp, 1 myń tonnadan astam gýmanitarlyq kómek jiberildi», - dedi Baýyrjan Baibek.
Saiasi keńes otyrysynyń qorytyndysy boiynsha Úkimettiń sailaýaldy baǵdarlamasyn iske asyrý jónindegi esebi aldyn ala maquldandy, partiianyń Jarǵysy men Saiasi Doktrinasyna ózgerister qaraldy. Praimerizdiń 78 jeńimpazy engen Májiliske arnalǵan partiialyq tizim, sondai-aq jumys organdarynyń quramy men partiianyń kezekten tys XX Seziniń kún tártibi bekitildi.
