Úsh aiǵa jalǵasqan «Nur Otan» partiiasynyń tuńǵysh respýblikalyq praimerizi aiaqtaldy. Bul týraly partiia Tóraǵasynyń birinshi orynbasary Baýyrjan Baibek málim etti, dep habarlaidy "Ult aqparat".
«Elbasy, partiia Lideri Nursultan Nazarbaevtyń bastamasymen qolǵa alynǵan «Nur Otan» partiiasynyń tuńǵysh respýblikalyq praimerizi aiaqtaldy.
Ol úsh ai boiy – 17 tamyzdan 17 qarashaǵa deiin júrdi.
Bul úsh ai úmitkerler úshin de, sol sekildi partiianyń ortalyq apparatynan bastap, aýdandyq filialdaryna deiingi barsha qyzmetkerleri úshin de úmit pen kúdikke toly qarbalas sát bolǵany sózsiz. Osyndai aýqymda praimeriz ótkizý ońaiǵa soqpady. Dese de, partiia Lideri men partiialastardyń, sondai-aq Jaqtastar ligasynyń qoldaýynyń arqasynda biz «Nur Otan»-dy «qaita jandandyrý» boiynsha alǵa qoiylǵan mindetterdi tiisinshe oryndap shyqtyq.
Irikteý protsesiniń ashyqtyǵy men aiqyndyǵynyń arqasynda praimerizge degen jurt qyzyǵýshylyǵy osy kezeń ishinde tolas tappady. Daýys berýdiń birinshi kezeńine 662 myńnan asa adamnyń, iaǵni barsha nurotandyqtardyń 84% qatysýy – osynyń aiǵaǵy. Praimerizge qatysqan 10 myń úmitkerdiń árqaisysynyń óz jaqtastary men baqylaýshylary boldy. Bul atalǵan is-sharaǵa 1,5 milliondai qazaqstandyqty tartýǵa múmkindik berdi», - dep jazdy B.Baibek Facebook-paraqshasynda.
Onyń aitýynsha, partiiaishilik irikteý el ishindegi belsendi de talantty jandardyń ózderin kórsetip, ideialaryn tanystyrýyna, jańa jaqtastar men dostar tabýyna jol ashty.
«Sonymen, ekinshi kezeńniń qorytyndysy boiynsha 6253 adam «Nur Otan»-nyń barlyq deńgeidegi 216 máslihatqa arnalǵan partiialyq tizimderine endi.
Kúni keshe ǵana praimerizdiń úshinshi kezeńi aiaqtaldy. «Nur Otan»-nyń Qazaqstan Respýblikasy Parlamentiniń Májilisine arnalǵan partiialyq tizimine 17 óńirden kandidattar anyqtaldy.
Pikirsaiystar qorytyndysy boiynsha 267 úmitkerdiń ishinen jasyryn reitingtik elektrondy daýys berý arqyly 78 adam sailandy.
Onyń ishinde 9 kandidat – praimerizge qatysý úshin qatarymyzǵa qosylǵan partiianyń jańa músheleri. Partiialyq tizimge Májilistiń qyzmettegi depýtattarynan 5 adam endi.
Partiialyq tizimniń úshten birine jýyǵyn áielder qurasa, al 12 kandidat – 35 jasqa deiingi jastar. Jeńimpazdardyń ortasha jasy – 47 jas.
Olardyń 27% - shaǵyn jáne orta biznes ókilderi, 24,5% - ekonomister, 11,5% - zańgerler, al 6 kandidattyń ǵylymi dárejesi bar. Ásirese, ónerkásip, memlekettik basqarý, bilim, densaýlyq saqtaý, sondai-aq úkimettik emes sektordyń ókilderi basymdyqqa ie.
Osy oraida praimerizde top jarǵandardy quttyqtai otyryp, Elbasy, partiiamyzdyń Lideriniń bastamasyna qoldaý bildirip, saiasi dodada baq synaǵan 10 myń qatysýshynyń árqaisysyna shynaiy alǵys bildiremin!
Qymbatty dostar, sizderdiń arqalaryńyzda praimeriz partiialyq «áleýmettik lift» arqyly talantty da belsendi, el taǵdyryna alańdaityn azamattardy jaýapty isterge aralastyrýdyń pármendi quralyna ainaldy. Munda eshkim de utylǵan joq. Bári de igilikke jetti. Ásirese, elimiz úshin igi is boldy! Partiialyq tizimder boiynsha sailaý júiesin engizý aiasynda biz bárimiz birge elimizde jańa saiasi mádenietti qalyptastyrýǵa jol ashtyq.
Oń tájiribeni eskere otyryp, partiia Lideri Nursultan Nazarbaev «Nur Otan»-nyń Jarǵysyna partiianyń praimeriz – partiiaishilik sailaýyn ótkizýi týraly normany engizýdi tapsyrdy. Jarǵyǵa engiziletin ózgeristerdiń tiisti jobasy biylǵy 25 qarashada ótetin partiianyń kezekten tys HH Seziniń bekitýine shyǵarylady.
Bul rette Elbasy bastamashylyq etken «Senim. Dialog. Bolashaqqa nyq qadam» partiiany «qaita jandandyrý baǵdarlamasy óz tiimdiligin kórsetkenin naqty aitýǵa bolady.
Zaman alǵa tartqan talaptardy ýaqtyly eskere otyryp, «Nur Otan» tek jańaryp qana qoimai, básekelestik negizde jurt qoldaýyna ie bolǵan partiialyq tizimdi qalyptastyrdy. Sondai-aq, árbir aýdan, qala jáne óńir boiynsha halyq pikiri barynsha eskerilgen 216 sailaýaldy baǵdarlamany qabyldady.
Biz bekem birlik pen berekeli tirlikke súiene otyryp qana elimizdi órkendetemiz!», - dedi Baýyrjan Baibek.
