Qoǵamdyq qabyldaý: naqty kómek, naqty nátije
«Nur Otan» partiiasynyń respýblikalyq qoǵamdyq qabyldaý bólmesinde Parlament Májilisiniń depýtaty Balaiym Kesebaeva baspana alý kezeginen shyǵarylǵan, QR azamattyǵyn ala almai júrgen jáne Memlekettik kiris departament qyzmetkeriniń zańǵa qaishy áreketinen japa shekken adamdarmen kezdesti.
Osydan birneshe jyl buryn ekinshi toptaǵy múgedek, 4 balanyń anasy Madina Esmaǵanbetova Qazaqstanǵa Túrkimenstannan qonys aýdaryp keledi. Ol súieneri men seneri bolmaǵandyqtan birden baspanaǵa zárý jandardyń tizimine tirkeledi. Basynda kezegi tez jyljidy. Osyǵan qýanyp, úmittenip júrgende 5 jyl ýaqyt ótedi. Bul aralyqta Madina Qazaqstan azamattyǵyn alyp úlgeredi. Bul týraly shaǵymdanýshy bylai dedi: «Kúni keshege deiin men oralman retinde memleketten kómek alamyn dep júrdim. Turǵyn úi basqarmasynyń qyzmetkerleri meni osyǵan sendirip keldi. Al qazir maǵan Qazaqstannyń azamattyǵyn alýyma bailanysty oralman mártebesinen aiyrylǵanymdy endi, baspana kezegine qaita turýym kerek ekenin aityp otyr. Sonda meniń osyǵan deiingi kezegim qaida ketti? Men 4 balamen áldekimderdiń páterleri men jertólelerin jaǵalap júre berýim kerek pe? Bulai it qorlyqpen ómir súrgenshe ózimniń de, balalarymnyń da baqilyq bolǵany durys shyǵar» dep ashyndy ana.
Halyq qalaýlysy ótinish iesin sabyrǵa shaqyryp, jaman oidan arylý qajettigin aitty.
– Siz balalaryńyzdy dúniege ósirý, óndirý úshin ákeldińiz. Sondyqtan artyq oidan aýlaq bolǵanyńyz durys. Sizge kásibi zańgerlerdiń kómektesýine yqpal etemin. Máseleniń mán-jaiy búginnen qaldyrylmai anyqtalady. Eger Turǵyn úi basqarmasynyń qyzmetkerleri zańǵa qaishy áreketteri áshkerelense, quzyrly organdar olarǵa qarsy shara qoldanady. Biz sizdiń quqyǵyńyz ben múddeńizdi sońyna deiin qorǵaimyz. Memleket ana men balany shyryldatyp qoimaidy, – dedi depýtat.
Ońtústik Qazaqstan oblysy Saryaǵash aýdany Jibek joly aýylynyń turǵyny Ásiia Medeýbaeva halyq qalaýlysynan qyzyna QR azamattyǵyn alyp berýdi surady.
– Qyzym Ózbekstanǵa turmysqa shyǵyp, Qazaqstannyń azamattyǵynan bas tartqan bolatyn. Qazir óz otanynda ómir súrip jatsa da, azamattyq ala almai júr. Sebebi, der kezinde qujattaryn rásimdegen joqpyz. Endi ne isterimizdi bilmei júrmiz, – dedi ol.
B.Kesebaeva máseleni zań aiasynda sheshý qajettigin tilge tiek ete kelip: «Bul másele sheshiledi. Biraq qyzyńyz quqyq buzǵany úshin memleketke aiyppul tóleidi. Biz sizderge kómektesemiz. Qyzyńyz azamattyq alady, ýaiymdamańyz» dedi.
Respýblikalyq qoǵamdyq qabyldaýǵa Manýza Stamqulova esimdi býhgalter ózi qyzmet etetin JShS-nyń esepshottaryn qalalyq Memlekettik kiris departamenti zańsyz buǵattap tastaǵanyna narazylyq bildirip kelipti.
Osy týrasynda ol «Bizdiń mekemeniń keńsesi jekemenshik sektorda ornalasqan. Ol jerde bizden basqa uiymdar men páter jaldaýshylar bar. Tekserispen kelgen qalalyq Memlekettik kiris departamentiniń qyzmetkerleri bizdi taba almai, qujattaryn «kórsetilgen mekenjaida JShS tirkelmegen. Áreketteri zańsyz» dep rásimdep, jumysymyzdy toqtatyp tastady. Biz olarǵa birneshe ret bardyq. Olar ózderiniń qatesin moiyndap otyr. Alaida esepshottarymyzdy bosatpai tur. Sonyń saldarynan biznesimiz shyǵyn shegip jatyr. Olardy sotqa berdik. Endi sottyń nátijesin kútip otyrmyz. Biraq biz másele qalalyq Memlekettik kiris departamenti qyzmetkerleriniń paidasyna sheshilip kete me dep qorqamyz» dedi.
B.Kesebaeva memlekettik qyzmetkerlerdiń orasholaqtyqqa jol berip, óz isterine atústi qaraǵandyǵy dáleldense másele olardyń paidasyna sheshilmeitinin kesip aitty.
«Bulai bolýy múmkin emes, bulai bolmaidy da. Biz bul isti nazarǵa alamyz. Naqty nátije shyqqanǵa deiin sizdermen birge bolamyz» dedi halyq qalaýlysy.
.jpeg)