«Nur Otan» partiiasynyń baspasóz hatshysy Timýr Bazarbaev Májilis depýtaty, «Aq jol» partiiasynyń jetekshisi Azat Perýashevtiń ákimderdiń jáne «Nur Otan» partiiasynyń filialdary tóraǵalarynyń laýazymdaryn biriktirýine qatysty málimdemesine jaýap berdi, dep habarlaidy "Ult aqparat".
«Men A. Perýashevtiń ákim men«Nur Otan» partiiasy filialynyń tóraǵasy qyzmetterin biriktirýge jol berilmeitini týraly málimdemesin oqydym. Halyqaralyq tájiribeni eskere otyryp, bul málimdemeniń túsiniksiz ekenin atap ótkim keledi. Memlekettik jáne partiialyq jumysty biriktirý tájiribesi kóptegen elde bar (Germaniia, Italiia, Portýgaliia, Ispaniia, Belgiia, Avstriia jáne t.b.) jáne olar bir maqsatty kózdeidi. Ol - jeńiske jetken partiianyń sailaý aldyndaǵy ýádelerin sapaly oryndaý.
Mysaly Matteo Rentsi bir kezderi Florentsiia meri jáne Italiia Demokratiialyq partiiasynyń jetekshisi laýazymdaryn birge atqardy. 2013 jyly Belgiianyń Antverpen qalasynyń meri bolyp sailanǵan Bart de Vever «Jańa flamanddyq alians» partiiasynyń jetekshisi boldy. 2018 jyldyń naýryzynan bastap Saardyń premer-ministri Tobias Teodor Hans HDS tóraǵasy atandy. 2007-2015 jyldar aralyǵynda Lissabon meri bolǵan Antonio Kosta Portýgaliianyń sotsialistik partiiasyn basqardy. Demokratiiasy damyǵan elderden mundai mysaldar jeterlik.
«Aq jol» partiiasynyń tóraǵasy óziniń suhbattarynyń birinde «úkimet quramyn (atqarýshy bilik dep oqyńyz) prezidenttiń maquldaýyna parlamenttik sailaýda jeńgen partiia usynýy kerek» degen bolatyn.
Ózderińiz biletindei, bizdiń elde ákimder «Nur Otan» partiiasynyń músheleri bolyp otyrǵan máslihattar depýtattarynyń kelisimimen taǵaiyndalady. Al laýazymdardy úilestirý - bul A. Perýashev aitqandai, «júieli jumystar júrgizýge jáne nátijeler úshin jaýap berýge» múmkindik beretin ońtaily tásil.
«Nur Otan» filialynyń tóraǵasy laýazymy - bul artyqshylyq emes, orasan zor jaýapkershilik jáne úlken áleýmettik júk!
«Olar bilikke emes, búkil halyqqa qyzmet etsin» degen tilektiń ózi - uǵymdardy almastyrý úshin sózdi oinatýdan basqa eshteńe emes. «Nur Otan» partiiasynyń qyzmeti shaǵyn biznesmender tobynyń múddelerin qorǵaýǵa emes, eldiń búkil turǵyndaryn, barlyq áleýmettik toptaryn júieli qoldaýǵa baǵyttalǵan. «Nur Otan» keibireýlerge qaraǵanda kópshiliktiń, barlyq qazaqstandyqtardyń partiiasy.
Pandemiia kezinde «Aq jol» ózin biznes jaǵynda ekenin kórsete otyryp, kásipkerlerdi biriktirip, muqtaj azamattarǵa qoldaý kórsete alatynyn baiqatpady. Buqaralyq aqparat quraldaryndaǵy birneshe epizod kóz aldaý bolyp shyqty.
«Nur Otan» bolsa osy baǵytta teńdessiz isterdi atqardy. «Birgemiz» qory arqyly tólemderden basqa, azyq-túlik pen qajetti taýarlardy jetkizdi, qai partiiada ekenine qaramastan barlyq azamattarǵa keńes berdi. Biyl 350 myńnan astam azamat tek qoǵamdyq qabyldaý bólmeleri arqyly partiiany qoldaýǵa ótinish bildirdi, bul tipti «Aq joldyń» músheleriniń resmi jariialanǵan sanynan da kóp.
Akzhol.kz-tiń habarlaýynsha, 2016 jylǵy jeltoqsandaǵy jaǵdai boiynsha bul partiia músheleriniń sany 255 800 adamdy quraǵan. Ótken parlamenttik sailaýdaǵydai (7,18% daýys) olar óz partiialary úshin daýys beredi dep úmittenemin, eger olar, árine, ózderiniń múshelikterin umytyp ketpese boldy.
«Nur Otan» siiaqty ákimderdi óz qatarlarynan usyna bilý úshin sailaýda jeńiske jetip, óz álińizdi sózben emes, ispen dáleldeýińiz kerek. Batystaǵy ergejeili partiialardyń ózi mundai konstrýktivti sipattan tys málimdemege jol bermeidi», - dep jazady Timýr Bazarbaev Facebook paraqshasynda.
