Bul týraly partiia Tóraǵasynyń Birinshi orynbasary Almatyda ótken Prezidenttiń bes áleýmettik bastamasynyń júzege asyrylýyn baqylaý jónindegi qoǵamdyq keńestiń otyrysynda málimdedi.
Óz sózinde Máýlen Áshimbaev partiia tarapynan áleýmettik bastamalardyń mańyzyn halyqqa túsindirý jáne júzege asyrý jumystary júieli júrgizilip kele jatqanyn aitty. Sondai-aq ol osy baǵyttaǵy keibir máselelerge nazar aýdardy.
– Qoǵamda «7-20-25» baǵdarlamasy boiynsha alǵashqy jarnanyń kólemin tómendetý máselesi aitylyp júrgeni belgili. Árine, atalǵan jarnany birden alyp tastaýǵa bolmaityny túsinikti. Sebebi, páter alǵan azamat tarapynan da jaýapkershilik bolýy kerek. Osy máseleni sheshý úshin keibir azamattarǵa áleýmettik qaitarymsyz kómek nemese protsentsiz kredit retinde alǵashqy jarnanyń jartysyn jergilikti atqarýshy organdar tóleý týraly bastamasyn kóterip, ony «Baspana» ipotekalyq uiymyna joldaǵan bolatynbyz. Olar soǵan sáikes óz tetikterin daiarlady. Endi sol usynysty ákimdiktermen birlesip júzege asyrý úshin aimaqtyq filialdarymyzǵa joldaityn bolamyz. Osylaisha bul ideiany ortalyq jáne jergilikti deńgeide jan-jaqty júzege asyrý jolynda júieli jumys júrgizemiz, – dedi Máýlen Áshimbaev.
Jiyn barysynda Almaty qalasynyń ákimi, «Nur Otan» partiiasy qalalyq filialynyń tóraǵasy Baýyrjan Baibek Memleket basshysynyń aýqymdy áleýmettik jobalaryn oryndaý boiynsha qalada atqarylyp jatqan jumystar týraly aitty. Onyń sózine qaraǵanda, qazirgi tańda elimizde «7-20-25» baǵdarlamasy boiynsha berilgen ótinimderdiń 35 paiyzdan astamy Almatyǵa tiesili. Onyń ústine, qalalyq ótinishterdiń jartysy maquldanǵan. Bul – quny 6,1 mlrd. teńge bolatyn 480 páter. Soǵan bailanysty «Nurly jer» baǵdarlamasy boiynsha biyl qalada 6 myńnan astam páterdi paidalanýǵa berý josparlanyp otyr.
Óz kezeginde Prezidenttiń bes áleýmettik bastamasynyń júzege asyrylýyn baqylaý jónindegi respýblikalyq qoǵamdyq keńestiń tóraǵasy, Senat depýtaty Baqytjan Jumaǵulov bes áleýmettik bastamanyń Almaty qalasy úshin mańyzy asa zor ekenin aitty. Tóraǵanyń aitýynsha, áleýmettik bastamalardy júzege asyrý týraly «Jol kartasyndaǵy» 36 tarmaqtyń 29-y búginde oryndalǵan.
Budan basqa, basqosýda «Damý» kásipkerlikti damytý qory» AQ-nyń basshysy Dáýlet Ábilqaiyrov, «Baspana» Ipotekalyq uiymy» AQ-nyń basqarma tóraǵasy Qairat Altynbekov jáne Halyqaralyq innovatsiialyq tehnologiialar ýniversitetiniń rektory Damir Shynybekov sóz sóilep, óz usynys-pikirlerin bildirdi.
