Elordada reseilik tarihshy-ǵalym, Novosibir oblysynyń burynǵy vitse-gýbernatory Viktor Kozodoidyń «Álihan Bókeihanov. Dáýir adamy» («Alihan Býkeihanov. Chelovek-epoha») atty kitabynyń tusaýkeseri ótti, dep habarlaidy QazAqparat.
«Álihan Bókeihanov týraly kitap jazýdy 2019 jyly bastadym. Biyl týyndyny aiaqtap jýyrda Novosibirde tanystyrylymy ótti. Ataýyna qatysty uzaq oilandym. Sebebi Álihan tarihi tulǵa, sondyqtan oǵan qatysty eńbektiń ataýy asa mańyzdy. Jalpy bul kitap Resei jurtshylyǵy men onyń ǵylymi qaýymyna arnalyp jazyldy. Qazaqstan kórshi, dos el bolǵanymen oǵan qatysty kópshilik bile bermeitin tarihi oqiǵalar kóp. Mysaly, kóne Rim, Grekiia nemese Angliia týraly tarihtan jaqsy bilemiz, al kórshi otyryp Qazaqstanǵa qatysty keibir jaittardan habarymyz bolmai jatady. Osy oraida atalǵan týyndy qazaq halqyna jasaǵan syiym dese de bolady», - dedi Viktor Kozodoi kitaptyń tusaýkeser rásiminde.
Avtor Álihan Bókeihanov týraly kitap jazýda Qazaqstan men Reseidiń 10 qalasynyń 12 arhivimen jumys istepti.
«Men buǵan deiin Sibir tarihyn zerttegem. Onyń ishinde azamat soǵysy men tóńkeris kezindegi Sibirdi. Sonda baiqaǵanym, 1920 jyly Qazaq-qyrǵyz avtonomiiasy qurylǵan. Osy tusta mende qiyn-qystaý zamanda qazaqtarǵa óz aldyna avtonomiialy el bolý qalai buiyrdy degen suraq týyndady. Árine, bul jerde Álihan Bókeihanovtyń róli zor. Áitpese, sol kezde Resei imperiiasynyń quramynda júzdegen halyq ómir súrdi. Solardyń ishinde Qazaqstan ǵana avtonomiialy el bola aldy», - deidi ol.
Onyń aitýynsha, jańa týyndyda Álihan Bókeihanovtyń ómiri men saiasi qyzmetine qatysty tyń arhivtik derekter jariialanyp otyr.
Odan bólek, tarihshy jerlesimiz týraly kitap jazýyna Reseide Álihan Bókeihanov týraly eńbektiń joqtyǵy sebep bolǵanyn aitty.
Elordadaǵy L.Gýmilev atyndaǵy Eýraziia ulttyq ýniversitetinde ótken aitýly sharaǵa tarihshylar, ziialy qaýym ókilderi jáne stýdentter qatysty.
