Qatty nóserden Shymkent kóshelerin sý basty, dep habarlaidy QazAqparat.
Shymkentte qatty jaýyn-shashyn saldarynan qala kóshelerin sý basyp, júrginshilerge kóp kedergisin keltirdi. Jerasty joldary men aýlalar, kólik joldary sýǵa toldy.
Qala aýmaǵyndaǵy jańbyr sýyn sorý jumystaryn úilestirý boiynsha Tótenshe jaǵdailar departamentiniń Daǵdarys ortalyǵynda jedel shtab quryldy.
«Jalpy sý sorý jumystaryna Tótenshe jaǵdailar departamentiniń jeke quramynan 113 qyzmetker jáne 39 tehnika, 38 motopompa, 1 jyljymaly, 255 qaptalǵan qum, jergilikti ákimshilikten 14 vodovoz, 2 motopompa jumyldyryldy. Jalpy 6834 tekshe metr sý soryldy. Zardap shekkender men qaitys bolǵandar joq, jeke turǵyn úilerdi sý basýy oryn almady» - delingen Shymkent qalasy TJD qoǵammen bailanys toby taratqan habarlamada.
Jańbyr sýyn sorý jumystaryn júrgizý úshin 44 mekenjaiǵa kúshter men quraldar jiberilgen. Qyzmetkerler túngi saǵat 4-ke deiin jumys istep, kóshelerdi sýdan tazartty. Jeke sektordaǵy úilerdi sý almaýy úshin, qapqa salynǵan qumdar arqyly bógetter jasaldy.
«Qazir qalada jaǵdai turaqty. Jerasty joldarynyń barlyǵy sýdan tazartyldy. Túnimen jeke quram kezekshilikpen jumys istedi. Búginde daýyldy eskertý jáne nóser jaýý týraly eskertý berilgen. TJD qyzmetkerleri kezekshilikti jalǵastyrýda», - dedi Shymkent qalasy TJD qoǵammen bailanys tobynan.
