Nurlan Noǵaev Jańaózen qalasyna barǵan jumys saparynyń úshinshi kúni qala turǵyndarymen kezdesip, azamattardy jeke qabyldady, dep habarlaidy Mańǵystaý oblysy ákiminiń baspasóz qyzmeti.
Esep berý kezdesýinde Jańaózen qalasynyń ákimi Maqsat Ibagarov 2021 jyly atqarylǵan jumystardyń qorytyndysyn baiandap, 2022 jylǵa arnalǵan josparlar týraly aityp berdi. Oblys ákimi Nurlan Noǵaev óz kezeginde jinalǵandardy óńirde júrgizilip jatqan jumystar týraly habardar etip, olardyń suraqtaryna jaýap berdi, usynystaryn tyńdady.
Kezdesýde qala turǵyndary jumyspen qamtý, aýyz sý tapshylyǵy, meditsina salasyndaǵy kadr tapshylyǵy, eski kóppáterli turǵyn úilerge kúrdeli jóndeý júrgizý, kásipkerlikti damytý jáne qoǵamdyq kólikterdiń sanyn arttyrý boiynsha máselelerdi kóterdi.
Nurlan Noǵaev óńirde azamattardy túrli salalarda jumysqa ornalastyrýǵa baǵyttalǵan birqatar memlekettik baǵdarlama bar ekenin atap ótti. Alaida kópshilik munai-gaz salasyna ǵana jumysqa ornalastyrýdy surady.
- Prezident Qasym-Jomart Toqaev óz Joldaýynda memlekettik organdar jumysynyń basty qaǵidaty ádilettilik pen ashyqtyq bolyp tabylatynyn atap ótti. Halyqtyń týyndaǵan barlyq máselelesin biz quqyqtyq salada, qoldanystaǵy zańnama aiasynda sheshetin bolamyz. Bul eńbek daýlaryna da, jumysqa ornalasý máselelerine de qatysty. Meniń jeke qabyldaýyma kelgen turǵyndar ózderin nemese otbasy múshelerin munai-gaz salasyna jumysqa ornalastyrý boiynsha ótinish bildiredi. Men qoldanystaǵy algoritmdi attap ótip, kezekten tys jumysqa turǵyza almaimyn, jumyspen qamtý ortalyǵyn ainalyp óte almaimyn. Sebebi, bul jumysqa ornalasý kezeginde turǵan azamattarǵa ádiletsiz bolady. Bizdiń basty mindetimiz - ózekti máselelerdiń júieli sheshimin tabý. Barlyq oblys turǵynyn munai - gaz salasyna jumysqa ornalastyrý múmkin emes ekendigin túsiný mańyzdy. Sondyqtan biz túrli beiindegi shaǵyn jáne orta biznes kásiporyndarynda jumys oryndaryn qurý boiynsha jumystardy jalǵastyratyn bolamyz. Biz birlesip qana jańa Qazaqstandy qura alatynymyzdy atap ótkim keledi, - dedi Nurlan Noǵaev.
Eseptik kezdesý aiaqtalǵannan keiin oblys ákimi azamattardy jeke qabyldady.
2022 jyldyń esebi boiynsha Jańaózende 159 myń adam tirkelgen. Onyń 77 myńy Teńge, Qyzylsai, Rahat, Kendirli aýyldarynda turady. Densaýlyq saqtaý salasynda 10 meditsinalyq uiym jumys isteidi, onyń ishinde: 3 emhana, 1 kóp beiindi aýrýhana, 2 dárigerlik ambýlatoriia, jedel jáne shuǵyl járdem stantsiiasy bólimshesi jáne 3 jeke menshik uiym.
Búginde qalada 86 dáriger mamany jetispeýshiligi baiqalady. Bul máseleni sheshý úshin respýblika kólemindegi meditsinalyq joǵarǵy oqý oryndarymen kelissóz júrgizilip, túlekter jármeńkelerine qatysyp, mektep bitirýshilerdiń arasynda bilikti, tájiribeli dárigerlermen proforientatsiialyq jumystar uiymdastyrylýda.
Jańaózen qalasyna aýyz sý táýligine ortasha 30 myń tekshe metr kóleminde berilýde. Jaz ailarynda aýyz sý qajettiligi 42 - 45 myń tekshe metrge deiin jetedi. Demek, aýyz sý tapshylyǵy ortasha táýligine 10 - 12 myń tekshe metrdi quraidy. Osy aýyz sý tapshylyǵyn sheshý maqsatynda:
- Keshendi jospar aiasynda, «Kendirli demalys aimaǵynyń aýdanynda magistraldyq qubyry bar, qýaty táýligine 50 myń tekshe metr teńiz sýyn tushytý zaýytyn salý» jobasy iske asyrylýda.
Sonymen qatar «Nurly jer» baǵdarlamasy sheńberinde «Teńge jáne Rahat aýyldaryndaǵy aiaqtalmaǵan jer ýchaskeleriniń injenerlik jelileriniń (9,5 shaqyrym gaz qubyry, 9,3 shaqyrym sý qubyry, 9 shaqyrym elektr jelisi) qurylysyn salý» jobalary iske asyrylýda.
