Búgin Ortalyq kommýnikatsiialar qyzmetindegi baspasóz máslihatynda Atyraý oblysynyń ákimi Nurlan Noǵaev óńir ýniversitetterindegi jemqorlyq faktilerine qynjylys bildirdi, dep habarlaidy "Ult aqparat".
«Atyraýdyń eki ýniversitetiniń sybailas jemqorlyq boiynsha aldyńǵy orynda turǵany, árine qynjyltady. Bul búkil Atyraý turǵyndaryn alańdatady. Sebebi árkim óz balasynyń, urpaǵynyń laiyqty bilim alǵanyn qalaidy», - dedi Nurlan Noǵaev BAQ ókilderiniń saýalyna orai.
Onyń atap ótýinshe, Atyraý ýniversitetterin jemqorlyq jailaǵany «Nur Otan» partiiasynyń jemqorlyqqa qarsy qoǵamdyq keńesinde talqyǵa túsken.
«Degenmen, ýniversitet óz tarapynan biraz sharany júrgizip jatyr. Siz atap ótken derekter - «Jas Otan» jastar qanatynyń saýalnama júrgizý arqyly alǵan nátijesi. Oǵan qatysqan 50 myń stýdent oqý ordasynda jemqorlyq bar ekenin aitqan eken. Óz kezeginde H.Dosmuhamedov atyndaǵy Atyraý memlekettik ýniversiteti jumysyn istep jatyr. Atap aitqanda, rektorat oqytýshylardyń sessiiada qaisysy paraǵa beiim ekenin anyqtaý úshin stýdentter arasynda saýalnama júrgizedi. Sonyń nátijesinde yqtimal oqytýshylardy emtihan, synaq alýǵa jibermeidi. Bul - bir kúnde bitetin is emes. Sessiianyń tazalyǵyn, diplom jumystarynyń ádildigin qamtamasyz etý baǵytynda ýniversitetterdiń óz ustanymy bar», - dedi Nurlan Noǵaev.
