Búginnen bastap Májilistiń resmi saitynda memlekettik organdardyń depýtattardyń saýalyna joldaǵan jaýaptary tolyǵymen jariialanatyn bolady, dep habarlaidy "Ult aqparat" Baq.kz portalyna silteme jasap.
«Endigi ýaqytta Májilistiń resmi saitynda tek depýtattyq saýaldar ǵana emes, memlekettik organdardyń laýazymdy tulǵalarynyń osy saýaldarǵa bergen jaýabynyń tolyq mátini ornalastyrylady. Osylaisha, depýtattyq korpýs, qoǵam, onyń ishinde buqaralyq aqparat quraldary ókilderiniń memlekettik organ basshylarynyń depýtattyq saýalǵa joldaǵan jaýabynyń tiisti talaptarǵa qanshalyqty jaýap beretinin baǵalaýǵa múmkindik týady. Meniń oiymsha, bul durys», - dedi Májilis tóraǵasy Nurlan Nyǵmatýlin.
Onyń aitýynsha, bir jaǵynan, bul depýtattyq saýaldarǵa memlekettik organdardan kelgen jaýaptardy tikelei kórýge jáne tolyq tanysýǵa jol ashady.
«Ekinshiden, tiisti organdardyń jaýapkershiligin kóterýge de yqpal etedi dep oilaimyn. Sondyqtan osy jumysty búginnen bastaimyz», - dedi palata spikeri.
