29 qazanda Frantsiianyń Nitstsa qalasyndaǵy shirkeýge bir adam pyshaqpen shabýyl jasap, úsh kisini óltirdi. Frantsiia prokýratýrasy terrorizm kúdigimen tergeýdi bastady.
Frantsiiadaǵy ońshyl saiasatker Marin Le Pen shabýyldaǵan adam bir áieldiń basyn keskenin jetkizdi. Bul aqparatty Frantsiia biligi resmi rastaǵan joq.
Nitstsa meri Kristian Estrozi Twitter paraqshasynda shabýyl qaladaǵy Notr-Dam shirkeýiniń janynda ne ishinde bolǵanyn, politsiia shabýyldaǵan adamdy ustaǵanyn habarlady. Onyń sózinshe, kúdikti qazir aýrýhanada jatyr.
Estrozi shabýyldaǵan adam birneshe ret "Allahý Akbar" dep aiǵailaǵanyn aitty. Frantsiia prezidenti Emmanýel Makron Nitstsaǵa jolǵa shyqqany habarlandy. Politsiia shabýyldan birneshe adamnyń jaraqattanǵanyn aitty.
Qazan aiynyń ortasynda el astanasy Parijde ulty sheshen jigit mektep muǵalimi Samiýel Patidiń basyn kesken. Muǵalim oqýshylarǵa Charlie Hebdo jýrnalyna shyqqan Muhammed paiǵambardyń karikatýrasyn kórsetken. Shabýyldaǵan sheshen jigit oqýshylarǵa Muhammed paiǵambardyń sýretin kórsetkeni úshin jazalaǵanyn aitqan.
Nitstsadaǵy shabýylǵa ne túrtki bolǵany belgisiz. Frantsiia ishki ister ministri Nitstsa jurtyn qalanyń ortalyǵyna shyqpaýǵa shaqyrdy.
Frantsiiadaǵy musylman dini boiynsha keńes Nitstsadaǵy bul shabýyldy synady.
"Qurbandardyń týysqandarynyń qaiǵysyna ortaqtasyp, Frantsiiadaǵy barlyq musylmandy 29 qazandaǵy Muhammed paiǵambardyń týǵan kúni – Máýlet merekesin toilaýdy keiinge qaldyrýǵa shaqyramyz" dep jazylǵan keńestiń málimdemesinde.
Patidiń óliminen keiin Frantsiia biligi Muhammed paiǵambardyń karikatýrasyn qoldanýǵa quqyǵy bar ekenin málimdegen. Parij ben taǵy birneshe qalada jeke jáne ákimshilik ǵimarattardyń qabyrǵalaryna marqum muǵalimniń portreti, respýblika belgisi men Muhammed paiǵambar karikatýrasynyń proektsiiasy shyǵaryldy.
Bul musylman elderinde narazylyqqa ushyrap, keibir elderdiń biligi Makrondy islamǵa qarsy saiasat ustanyp otyr dep aiyptady.
Nitstsada 2016 jyly 14 shildede týnistik 31 jastaǵy er adam Bastiliia kúnin toilap júrgen jurtty júk kóligimen taptap ótken.
Kólik júrgizýshisin sol jerde politsiia atyp óltirgen. Keiin "Islam memleketi" ekstremistik toby shabýylǵa jaýapkershilikti ózine alatynyn málimdegen. Nitstsadaǵy shabýyl saldarynan qaza tapqan 86 adamnyń arasynda Qazaqstannyń tórt azamaty bolǵan.
