Nemistiń Der Spiegel basylymy Máskeý anneksiialap alǵan Qyrymda Resei áskeri shoǵyrlanǵan lagerlerdiń spýtnikten túsirilgen sýretterin jariialady. Jýrnal lagerlerdiń 15 naýryz ben 2 sáýir aralyǵynda paida bolǵanyn jazady.
"Marfovka eldi mekeninen shamamen 30 shaqyrym jerde Resei áskeri baza ornatyp alǵan. 15 naýryzda bul aýmaqta eshteńe kórinbegen, 2 sáýirge qarai kún saiyn qurylys pen tehnika sany arta berdi" delingen maqalada. Lagerde myńnan astam avtomobil men ózge tehnika bar.
Conflict Intelligence Team (CIT) zertteý tobynyń málimetinshe, eshelondardyń baǵyty men áskeri kolonnalar túsip qalǵan kadrlarǵa qaraǵanda lagerde Soltústik Kavkazdyń 58-áskeri bólimi ornalasqan.
Ońtústik áskeri okrýgynyń baspasóz qyzmeti jaqynda Qyrymǵa ásker jiberetinin habarlaǵan. CIT lagerde tank, "Msta-S" artilleriia jabdyǵy siiaqty aýyr tehnika joq ekenin atap ótedi. Soǵan qaraǵanda lagerdiń qalǵan bóligi basqa aýmaqta ornalasqan.
CIT Qyrymǵa Pskovtan 76-desanttyq diviziiasynyń kelgeni jaily resmi túsiniktemeniń joqtyǵyna da nazar aýdarady. Desanttar men tehnika eshelony Simferopoldiń soltústiginde baiqalǵan. Biraq ol Feodosiiaǵa shoǵyrlanýy tiis taǵy bir bólim – 56-desanttar polki bolýy múmkin.
- Resei biligi Ýkrainamen shekarada jáne Qyrymda ásker kóbeitýdi qaýipsizdik sharasy dep túsindiredi. Buǵan deiin Donbastaǵy Resei qoldaityn separatister Ýkraina áskeriniń shabýylynan qaýiptenetinin málimdegen. Kiev shabýyl jaily aqparatty joqqa shyǵarady.
- Ýkraina biliginiń málimetinshe, Resei sońǵy aptalarda aimaqqa shamamen 80 myń sarbazyn ákelgen, 40 myńy Qyrymǵa jiberilgen. Buǵan Batys, NATO músheleri alańdaýshylyq bildirgen. Ýkraina prezidentimen kelissóz júrgizgen Germaniia men Frantsiia jetekshileri Máskeýdi jaǵdaidy ýshyqtyrmai, áskerdi alyp ketýge shaqyrǵan.
