Sýret: Aqorda
Búgin memleket basshysy Qasym-Jomart Toqaevtyń týǵan kúni. Ol 71 jasqa toldy.
Barshaǵa málim, prezident óz týǵan kúnin atap ótpeidi. Bul onyń otbasynda burynnan qalyptasqan dástúr.
«Ol bul kúndi atap ótýdi unatpaidy, sebebi onyń otbasynda balalardyń da, ata-analardyń da týǵan kúnderi atap ótilmeidi. Bul prezidenttiń túbegeili ustanymy», — degen edi onyń burynǵy baspasóz-hatshysy Rýslan Jeldibai.
Toqaev 17 mamyrdy qalypty jumys kúni dep esepteidi. Byltyr memleket basshysy osy kúni Qytaiǵa is-saparmen barǵan bolatyn.
Qasym-Jomar Kemeluly Toqaevtyń qysqasha ómirbaiany:
Qasym-Jomart Kemeluly Toqaev – Qazaqstannyń memleket jáne qoǵam qairatkeri, saiasi ǵylymdar doktory. 1953 jyly 17 mamyrda Almatyda týǵan.
Ákesi Kemel Toqaev (1923-1986) Uly Otan soǵysynyń ardageri, belgili qazaq jazýshysy bolǵan. Anasy Turar Shabarbaeva (1931-2000) Almaty shet tilder pedagogikalyq institýtynda jumys istegen.
1992 jyly Qasym-Jomart Toqaev QR Syrtqy ister ministriniń orynbasary bolyp taǵaiyndaldy. 1993 jyly syrtqy ister ministriniń birinshi orynbasary, 1994 jyly syrtqy saiasi vedomstvonyń basshysy boldy. Toqaev syrtqy ister ministrligin bes jyl basqardy.
1999 jyldyń naýryzynda premer-ministrdiń orynbasary bolyp taǵaiyndaldy. Al 1999-2002 jyldary Qazaqstan úkimetin basqarǵan. 2002 jyldyń qańtarynda otstavkaǵa ótinish berdi, keiin Memlekettik hatshy – Syrtqy ister ministri bolyp taǵaiyndaldy.
Toqaev bas-aiaǵy on jyl Qazaqstannyń syrtqy ister ministri boldy (1994 – 1999, 2002 – 2007). Syrtqy saiasi vedomstvonyń basshysy retinde iadrolyq qarýdy taratpaý isine belsene atsalysty. Burynǵy diplomattar Toqaevty "el diplomattarynyń jetekshisi, halyqaralyq diplomatiiada salmaǵy bar tulǵa" dep baǵalaidy.
2007-2011 jyldar aralyǵynda QR Parlamenti senatynyń tóraǵasy qyzmetin atqardy.
2011 jyldyń naýryzynda Toqaev BUU bas hatshysynyń orynbasary, BUU-nyń Jenevadaǵy bólimshesiniń bas direktory, sondai-aq Qarýsyzdandyrý jónindegi konferentsiianyń bas hatshysy bolyp taǵaiyndaldy.
2013 jyldyń 16 qazanynan beri – Parlament senatynyń tóraǵasy.
2019 jylǵy 20 naýryzda Qazaqstan Respýblikasynyń Prezidenti retinde ant qabyldady.
2019 jyly 9 maýsymda ótken kezekten tys Prezident sailaýynda 70,96 paiyz daýys jinap, Qazaqstan Respýblikasynyń Prezidenti bolyp sailandy. 2019 jyly 12 maýsymda QR Konstitýtsiiasynyń 42-babyna sáikes ant berip, resmi túrde sailanǵan Prezident retinde Memleket basshysynyń laýazymyna kiristi.
Qasym-Jomart Toqaev 2022 jyldyń 20 qarashasynda ótken kezekten tys prezident sailaýynda 81,31% daýys jinap, jeńiske jetti. 2022 jyly 26 qarashada Qazaqstan Respýblikasy Prezidentin saltanatty ulyqtaý rásimi ótti.
2021 jyly sáýir aiynan bastap Qazaqstan halqy Assambleiasynyń Tóraǵasy. 2022 jyly qańtar aiynan bastap Qazaqstan Respýblikasy Qaýipsizdik Keńesiniń Tóraǵasy. Tótenshe jáne Ókiletti Elshi. Saiasi ǵylymdarynyń doktory. Dúniejúzilik gýmanitarlyq jáne jaratylystaný ǵylymdary akademiiasynyń tolyq múshesi. Qaýipsizdik jónindegi Miýnhen konferentsiiasy «Ǵulamalar keńesiniń» múshesi. Shenchjen ýniversitetiniń (QHR) jáne Resei Federatsiiasynyń Syrtqy ister ministrligi Diplomatiialyq akademiiasynyń qurmetti professory. Qazaqstannyń halyqaralyq qatynastar jónindegi keńesiniń qurmetti prezidenti. Jeneva Diplomatiia jáne halyqaralyq qatynastar mektebiniń qurmetti dekany. Resei biografiialyq qoǵamynyń tujyrymy boiynsha 2018 jyldyń «Jyl adamy» laýreattarynyń tizimine engen. 13 jyl boiy Qazaqstannyń ústel tennisi federatsiiasyn basqardy.
Halyqaralyq qatynastar máselelerine arnalǵan 10 kitaptyń avtory.
Qazaq, orys, aǵylshyn, qytai jáne frantsýz tilderin biledi.
Belgili saiasatkerdiń hobbii – kitap oqý. Memýarlyq, tarihi jáne kórkem ádebietterdi súiip oqidy.
Belgili saiasatker "Tvitter" áleýmettik jelisin belsendi qoldanatyndardyń qatarynan. Eldegi jáne álemdegi mańyzdy oqiǵalarǵa qatysty pikirin jelide únemi bildirip otyrady.
Otbasy
Ajyrasqan, bir balasy bar. Uly Timýr Toqaev 1984 jyly Máskeýde týǵan, Shveitsariiadaǵy "Kollej diý Leman" jáne Vebster ýniversitetinde bilim alǵan. Saiasi ǵylymdar kandidaty.
