Negizsiz salyq tóleý týraly habarlama kelip tursa kaida júginýge bolady? Bul suraqqa QR QM Memlekettik kirister komiteti tóraǵasynyń orynbasary Azamat Sadyqov jaýap berdi, dep habarlaidy QazAqparat.
«Salyq tóleý tártibin, salyqtyq ákimshilendirý salasyn jeńildetip, tsifrlandyrý úshin birshama baǵytta jumys júrgizip jatyrmyz. Osy ýaqytqa deiin ne tyndyrdyq? Birinshiden memlekettik organdardyń aqparattyq júielerimen onlain integratsiia retke keltirildi. Iaǵni qazirgi ýaqytta salyq organdary onlain rejimde ózine qajetti málimetterdi ala alady. Sonymen qatar Memlekettik kirister komitetiniń eSalyq mobildi qosymshasy jumys istep tur», - dedi Memlekettik kirister komiteti tóraǵasynyń orynbasary Azamat Sadyqov tikelei efirde sóilegen sózinde.
Onyń aitýynsha atalmysh mobildi qosymshada salyqtyq ámiian qyzmeti iske qosylǵan.
«Ol salyq tóleýshilerdiń kóptegen máselesin sheshe alady. Qazir salyq tóleý úshin mindetti túrde salyq organdary mekemesine barýdyń qajeti joq. Bul qosymshany uialy telefondarǵa júktep alýǵa bolady. Sonymen qatar salyq ámiianyn toltyryp alý múmkindigi de bar. Sondai-aq bul qosymsha qazirgi jáne aldaǵy salyqtyq mindetter týraly aqparat berip otyrady», - dedi ol.
Azamat Sadyqov Memlekettik kirister komiteti Ákimshilik politsiia qyzmetimen birge salyq ámiianynda kólik quraldary boiynsha málimetterdi túzeý servisi iske qosylǵanyn jetkizdi.
«Bul degenimiz ne? Ishki ister organdarynyń salyq týraly jibergen habarlamamen kelispegen jaǵdaida salyq tóleýshi ýákiletti organǵa bul málimetti túzeý týraly habarlama joldai alady. Ýákiletti organ ol aqparatty tekserip, shynynda da qatelik ketkenin anyqtasa, málimetterdi túzep, ol týraly habarlama bizge túsedi. Tiisinshi qaryz boiynsha málimet túzetiledi. Jyljymaityn múlik boiynsha málimetterdi túzeý servisi de osyndai ádispen jumys júrgizedi», - dedi ol.
