Reseilik blogerdiń Qazaqstandaǵy baladan «nege oryssha bilmeisiń?» dep suraǵan videosy áleýmettik jelide qyzý talqyǵa tústi. Video astynda myńdaǵan pikir jazylyp, jeli qoldanýshylary blogerdiń áreketin synǵa aldy, dep habarlaidy ult.kz.
Kópshilik eń aldymen qazaq balasynyń orys tilin bilýge mindetti emes ekenin aitty. Pikir qaldyrǵandar Qazaqstanda memlekettik til qazaq tili ekenin eske salyp, ózge eldiń azamaty kelip ózge tilde sóileýdi talap etýge quqyǵy joq ekenin jazǵan.
Jeli qoldanýshylarynyń biri:
«Qazaqtar Qazaqstanda turyp oryssha sóileýge mindetti emes. Oryssha sóile deýge eshkimniń quqyǵy joq», - dep jazdy.
Taǵy bir pikir iesi:
«Nege ol baladan qandai til biletinin surap, videoǵa túsiredi? Adamdy uialtý úshin jasaǵan siiaqty», - dep narazylyǵyn bildirgen.
Keibir qoldanýshylar videodaǵy balanyń abdyrap, yńǵaisyz jaǵdaiǵa túskenin aityp, oǵan janashyrlyq tanytty.
«Bala qatty qysylyp qalǵan siiaqty. Tipti uialyp turǵandai kórindi», - dep jazǵan jeli qoldanýshysy.
Sonymen qatar kópshilikti alańdatqan taǵy bir másele kámeletke tolmaǵan balany ata-anasynyń ruqsatynsyz videoǵa túsirip, áleýmettik jelige jariialaý. Pikirlerde blogerdiń bul áreketi zań men etikaǵa sai emes ekeni aitylǵan.
«Balanyń ata-anasynyń ruqsatynsyz videosyn jelige salýǵa qandai quqyǵy bar?» - degen pikirler de kóp boldy.
«On segiz jasqa deiingi balaǵa ata-anasy ,synyp jetekshisi bolmasa qasynda qysym jasap osyndai suraqtar qoiyp qysym jasaýǵa bolmaidy. Balanyń quqyǵyn 18-jasqa deiin qorǵaityn sot oryndar osyny kórip zań aiasynda jaýap berińizdershi», - dep jazdy endi biri.
Áleýmettik jeli qoldanýshylary bul jaǵdaidy til máselesinen bólek, qoǵamdaǵy ózara qurmet pen mádeniet taqyrybymen de bailanystyrdy. Olar Qazaqstanda memlekettik tilge qurmetpen qaraý mańyzdy ekenin jetkizdi.
Bir qyzyǵy videoda jasóspirimdi kadrǵa alyp turǵan mobilograf ta balany qorǵaýǵa tyryspaǵan. Júzine qarasań qazaq siiaqty.
