Foto: videodan skrinshot
Qasym-Jomart Toqaev «Turkistan» gazetine bergen keń kólemdi suhbatynda Jańa jyl qarsańynda Kremlde Tuńǵysh prezident Nursultan Nazarbaevtyń Resei basshysymen taǵy da kezdesýine bailanysty pikir bildirdi, dep habarlaidy Ult.kz.
"Turaqty túrde ótkizilip júrgen kezdesýler beiresmi sipatqa ie. Muny Resei prezidentiniń ózi de atap ótedi. Taiaýda ótken Sankt-Peterbýrgtegi basqosýda Vladimir Pýtin maǵan Nursultan Nazarbaevty onyń ótinip suraýy boiynsha qabyldaitynyn aitqan edi. Resei prezidentiniń ereksheligi: ol dostarymen jáne áriptesterimen jyly qarym-qatynas qura biledi. Jumysy óte qarbalas bolsa da, senbi kúni Qazaqstannyń Tuńǵysh prezidentimen asyqpai áńgimelesýge ýaqytyn bóldi. Ol Nursultan Nazarbaevty Eýraziiadaǵy yqpaldastyq úderisiniń bastaýynda turǵan tájiribeli saiasatker retinde baǵalaidy. Resei bul úderiste jetekshi ról atqaryp otyr. Kremldegi kezdesý Vladimir Pýtinniń adamgershiligi joǵary ekenin kórsetedi. Ondai áńgimeler barysynda ne aitylǵany maǵan qyzyq emes, bul týraly eshqashan suraq qoimaimyn", - dep jaýap berdi Memleket basshysy.
Osydan keiin Nursultan Nazarbaevtyń jeke basyna qatysty óz pikirin bildirdi.
"Men ony qazirgi qazaq memlekettiginiń negizin qalaǵan tulǵa dep sanaitynymdy birneshe ret aittym. Onyń memlekettik institýttardy jáne ekonomikanyń naryqtyq tetikterin qurý, jańa astanamyzdy salý jolyndaǵy eńbegin bári biledi. Ózińizge málim, biz Qazaqstandy Ádildik, Zań jáne Tártip ornaǵan el etkimiz keledi. Sondyqtan, eshkimdi alalamai, ár azamattyń eńbegin ádil baǵalaý kerek. Bul elimizdiń Tuńǵysh prezidenti Nursultan Nazarbaevqa da qatysty", - dedi Prezident.
Prezidentke bilik tranziti týraly da suraq qoiyldy.
"Bul jóninde sóz qozǵaýǵa áli erte, aldymyzda tabandy jumysqa toly birneshe jyl bar", - dep jaýap berdi Toqaev.
Aita keteiik, Májilis depýtaty Ermurat Bapi Tuńǵysh prezidenttiń elden shyǵýyn shekteýdi usynǵan edi.
