Nazerke Áriptiń týǵan tátesi Jazira Sybanbaeva boijetkendi óltirgen qylmyskerdi ómir boiy bas bostandyǵynan aiyrýdy surap Feisbýkte jazba qaldyrdy, dep habarlaidy "Ult aqparat".
«Men - Nazerke Áriptiń tátesimin. Sol kúni Nazerke úiinen shyǵyp, taksi ustaǵan. Rólde Qurban Ysqaqov bolǵan. Ony ustaý úshin kóp ýaqyt ketti. Qazaqstannyń ár buryshynan týysqandary kelip izdestirdi. Q.Ysqaqov áýel bastan tergeýden kúdikti boldy. Ol buryn adam óltirgeni úshin 3 ret sottalǵan, biraq merziminen buryn bosap shyqqan», - deidi Jazira Sybanbaeva.
Onyń aitýynsha, Ysqaqov Nazerkeni óltirip, Keńsai ziratynda qaldyryp ketken.
«2 ai boiy Nazerkeniń múrdesi shyjyǵan kún astynda jatty. Sot kezinde Qurban Ysqaqov úsh aiyptyń bireýin ǵana óltirgenin ǵana moiyndady. Onyń ishinde ony zorlaǵanyn, qasaqana óltirý qylmystyq oi piǵyly bolǵanyn moiyndamady. Bizdiń sottyń, zańnyń ádildigine senemiz. Ol burynǵydai adam óltirgeni úshin otyryp shyǵyp, tártipti qylyǵy úshin qaita shyqqysy kelip tur ǵoi. Týra osylai boldy ǵoi. Qyzdyń ómirin úzdi. Endi kimniń kóz jasyna qalǵysy kelip júr?», - deidi kelinshek.
Qazir isti qylmystyq ister boiynsha aýdanaralyq mamandandyrylǵan soty qarap jatyr. Sot jabyq rejimde ótýde.
«Men ol adamnyń ómir boiy túrmede otyrǵanyn qalaimyn. Sebebi, buryn da azamattyq nekedegi áielin 18 jerinen pyshaqtap óltirgen, birneshe ret zorlyq jasaǵan. Sol úshin 11 jylǵa kesilip, onyń 9 jylyn otyryp shyqqan. Sonda osyndai qanisher adamdy qalaisha bosatýǵa bolady? Men ony ómir boiy túrmede otyrýyna qol jetkizýge tyrysamyn. Ol taǵy 10 jylda shyǵatyn bolsa, onda basqa qyzdardyń obalyna qalady», - dedi marqum Nazerkeniń anasy, japa shegýshi Sáýle Sarbaeva.
Onyń aitýynsha, sottalýshynyń anasy Nazerkeniń ata-anasyna baryp balasynyń esi durys emestigin alǵa tartyp aqtap alýǵa tyrysqan. Alaida, sot saraptamalarynyń nátijesinde kúdiktiniń aqyl-esi durys ekeni dáleldendi.
Almaty qalasy men Talǵar arasynda kóligimen jolaýshy tasýmen ainalysatyn kúdikti óz kinásin moiyndaǵan.
Is materialdaryna sáikes, kúdikti Nazerkeni sol kúni qalaǵa jetkizip salmaq bolǵan. Jarty jolda boijetkendi zorlap, býyndyryp óltirip Keńsai ziraty jaqqa aparyp tastaǵan. Aita ketý kerek, 10 shilde kúni 18 jastaǵy Nazerke Árip Tuzdybastaý aýylyndaǵy úiinen shyǵyp sol bette oralmaǵan. Keiin 6 qyrkúiekte Nazerkege uqsaityn qyzdyń denesi Keńsai ziratynan tabyldy.
