Qazaqstan Respýblikasynyń Tuńǵysh Prezidenti Nursultan Nazarbaevtyń tóraǵalyǵymen Qaýipsizdik keńesiniń otyrysy ótti, dep habarlaidy "Ult aqparat" Aqordaǵa silteme jasap.
Jiynda Túrkistan oblysynyń Arys qalasyndaǵy qazirgi ahýal jáne elimizdiń sý qaýipsizdigin qamtamasyz etý máseleleri talqylandy.
Qaýipsizdik keńesiniń Tóraǵasy Arys qalasynda qaza bolǵandardyń týystary men jaqyndaryna kóńil aitty, sondai-aq jarylys saldaryn joiýǵa atsalysyp jatqan barlyq quzyrly organ qyzmetkerleriniń jáne volonterlerdiń qajyrly eńbegin erekshe atap ótti.
– Sońǵy aqparatqa sáikes, zardap shekkenderdiń sany 160-tan asty. Barsha qazaqstandyqtar birligimizdiń bekem ekenin kórsetip jatqanyn atap ótkim keledi. Elimizdiń ár túkpirinen azamattar alańdaýshylyq bildirýde, túrli uiymdar men kásiporyndardyń jumyskerleri zardap shekkenderge kómek kórsetý úshin birigip jatyr. Bir óńirdiń basyna túsken qiynshylyq – bárimizge ortaq másele. Biz halqymyzdyń yntymaǵynyń arqasynda barlyq qiyndyqty eńseremiz. Barsha qazaqstandyqtarǵa rizashylyǵymdy bildiremin, – dedi Elbasy.
Nursultan Nazarbaev óńirde qalypty jaǵdaidy tezirek qalpyna keltirý jáne turǵyndarǵa jan-jaqty qoldaý kórsetý úshin memleket tarapynan barlyq sharalar qoldanylyp jatqanyn atap ótti.
Sý qaýipsizdigin qamtamasyz etý máselesi boiynsha elimizdegi sý resýrstarynyń jáne sý sharýashylyǵy nysandarynyń jai-kúii talqylandy. Sondai-aq, turǵyndar úshin taza aýyz sýdyń qoljetimdi bolýyna jáne sýdy únemdep paidalaný máselelerine erekshe nazar aýdaryldy.
Otyrys qorytyndysy boiynsha Arys qalasynda jóndeý jumystaryn júrgizý jáne azamattardyń turǵylyqty jerine oralýyn uiymdastyrý jóninde naqty tapsyrmalar berildi.
