Nursultan Nazarbaevtyń synynan keiin Astanada salynyp jatqan turǵyn úi keshenderi qaita boiala bastady, - dep habarlaidy "Ult aqparat" kaz.tengrinews.kz portalyna silteme jasap.
Astanadaǵy Highvill Park turǵyn úi kesheni qaita boialyp jatyr. Eske sala keteiik, 21 mamyrda Memleket basshysy EXPO-2017 halyqaralyq kórmesine qatysty máseleler boiynsha ótken jiynda ońtústikkoreialyq azamattyń salǵan sur tústi úidiń betkeilerine qatysty syn aitqan edi. Prezidenttiń aitýynsha, úidiń betkeileri aq, kók jáne sary tústerge boialýy kerek.
"Ońtústikkoreialyqtar jaqsy páterler men úlken úilerdi salady. Barlyǵy sur tústi. Turǵyn úi kesheni emes, IIM-ne arnalǵan ǵimarat siiaqty. Aq tústi úiler de bolýy kerek qoi. Munyń ne qiyndyǵy bar? Olar osynda ma? Biz sizderdi nege osy jumysqa tarttyq, sebebi sizder jaqsy úiler salasyzdar. Oǵan alǵys aitamyn, biraq nege sizder salǵan úidiń betkeilerdiń túri salynǵan úilerden jaman?", - degen edi Memleket basshysy 21 sáýirde ótken jiyn barysynda.
Aita keteiik, "Astana Arena" stadionynyń mańynda salynyp jatqan Highvill Park úi betkeileri aq, kók jáne sary tústerge boialyp jatyr.
Sondai-aq, Saryarqa dańǵylyndaǵy úiler jańa tústerge boialyp jatyr. Sary tústi bes qabatty úi kók jáne aq tústerge boialdy.
Esterińizge sala keteiik, osyǵan deiin Nursultan Nazarbaev Isekeshevti Astana kóshelerindegi qurylys qoqystary úshin sókken bolatyn. "Úilerdi jappai salýda - talap barlyǵyna birdei bolýy tiis. Keibir úi salýshylar óz qoqystaryn da shyǵarmaidy. Qalanyń barlyq jerinde qoqys, qara (Astana ákimi Áset Isekeshevke baǵyttai sóiledi - Avt. sózi), qoqys oryndary kóp bolyp ketken. Ádilbek Jaqsybekovtyń kezinde mundai múldem bolmaǵan. Qara, Áset, qurylys qaldyqtary", - degen edi Nursultan Nazarbaev sýretterdi kórsetip.
