Elimizdiń joǵary oqý oryndarynda oqytylatyn «Rýhani jańǵyrý» pánine Abaidyń qara sózderi men Elbasynyń «Táýelsizdik dáýiri» kitabyn engizý qajet.
Mundai usynysty Qyzylorda memlekettik ýniversiteti QHA kafedrasynyń meńgerýshisi, tarih ǵylymdarynyń kandidaty Nurlybek Myńjas jasady, dep habarlaidy QazAqparat.
Aita keterligi, búgin L.Gýmilev atyndaǵy Eýraziia ulttyq ýniversitetinde Memleket basshysy Nursultan Nazarbaevtyń «Táýelsizdik dáýiri» kitabyn talqylaýǵa arnalǵan Qazaqstan halqy Assambleiasy kafedralary respýblikalyq qaýymdastyǵynyń keńeitilgen otyrysy ótken bolatyn. Sharada Qyzylordadan tikelei beine bailanysqa shyqqan Nurlybek Myńjas Elbasy kitabyna shirek ǵasyrdaǵy memlekettiń adam kapitalyna degen kózqarasyn jańa syni turǵyda tujyrymdaǵan, tarihi baǵa bergen tushymdy eńbek dep atap ótti.
«Bul barsha qazaqstandyqtar úshin búgingi ómirdiń negizgi rýhani tirekteriniń, ekonomikalyq-áleýmettik damýdyń, mádeni jańǵyrýdyń basty paradigmalyq qundylyǵyn kórsetetin jańalyq bolyp enip jatyr. Sonymen qatar Elbasynyń eńbegi bolashaqta tórtinshi revoliýtsiialyq jańǵyrǵan dúniejúzilik qaýymdastyq jaǵdaiynda aldyńǵy qatarly damyǵan elderdiń legine bizdiń respýblikamyzdyń laiyqty túrde enýiniń jańa formýlasy dep túsinip otyrmyz», - dedi ol.
Osy rette QHA meńgerýshisi eki usynys jasady.
«Aldaǵy ýaqytta oqylatyn «Rýhani jańǵyrý» pánine eń birinshiden Abai Qunanbaevtyń 45 qara sózin qossaq. Sebebi álem moiyndaǵan hakim Abaidyń naqyl sózderi, kózqarastary keiingi ýaqyttaǵy Alash qairatkerleriniń, Táýelsizdik tusyndaǵy bizderdiń azattyq jolyndaǵy kúresimizdiń tiisti jalǵasy dep oilaimyn. Elbasynyń «Rýhani jańǵyrý» maqalasynyń astary da Abaidyń ulttyq pragmatikalyq kózqarastarymen mazmundas. Olar bir-birin tolyqtyryp, jetildirip tur. Ekinshiden Elbasymyzdyń «Táýelsizdik dáýiri» atty kitabyn da «Rýhani jańǵyrý» pánine qosýdy usynamyn», - dedi Nurlybek Myńjas.
