Elbasy Nursultan Nazarbaevtyń Dúniejúzi qazaqtarynyń V quryltaiynda sóilegen sóziniń tolyq mátinin oqyrman nazaryna usynamyz.
Ardaqty aǵaiyn!
Qymbatty baýyrlar!
Dúniejúzi qazaqtarynyń V quryltaiyna kelgen barshańyzǵa qazaqtyń qasterli Atajurty – Qazaq Eline, onyń bas ordasy – Astanaǵa qosh keldińizder dep, qýanyshymdy bildiremin!
Alty qurlyqqa saýyn aitqan myna alqaly jiynǵa álemniń 39 elinen 350-den astam qandasymyz keldi.
Qaida júrse de qazaqtyń tarihi otany bireý-aq. Ol – Qazaqstan.
Atamekenimiz jalǵyz, ol – bir ýys topyraǵyna deiin qasietti Qazaq Eli.
Búgingi basqosýǵa negizinen jas býynnyń ókilderi shaqyryldy.
Sebebi, jas urpaq túp qazyǵyn umytpai, bir tamyryn tarihi Otanynda jaiýǵa tiis.
Týǵan elimen bailanysyn nyǵaityp, ata saltyn saqtap, ana tilin umytpai, bilip ósýi qajet.
Quryltai balamaly energiia boiynsha jer júziniń innovatsiialyq jetistikterin pash etetin EKSPO-2017 kórmesine orai ótýde.
Biz arnaiy osylai bailanystyrdyq.
Sebebi, bul Qazaqstannyń mereiin asyryp, kúlli álemniń nazaryn aýdaratyn aýqymdy shara bolyp otyr.
Biz baýyrlarymyz Atajurtynyń búgingi kelbetin kórip, marqaisyn, oi túisin dep, sizderdi EKSPO-ǵa orai shaqyrdyq.
Dúnieni tańqaldyrǵan elordamyz – Astananyń ósip-órkendep bara jatqanyn kórsin, qýansyn dep oiladyq.
Kesheden beri Qazaqstannyń marqaiǵan, kórkeigen astanasyn kórip, kóz jetkizdińizder.
Qurmetti otandastar!
Alǵashqy quryltaidan beri 25 jyl ótti.
20 ǵasyrda qazaqtyń basynan ótpegen zulmat joq. Táýelsizdiktiń 25 jyly da qiyndyqsyz bolǵan joq.
Degenmen, qazaqtyń talantty halyq ekeni dúnie júzine belgili. Bárimiz birigip, jumyla jumys istep, birligimizden jazbaǵannyń arqasynda osy jyldar ishinde keleli tabystarǵa jettik.
Jalpy ortasha ómir súretin halyqtardan ozyp, olardan joǵary shyqtyq. 40 paiyz kedeishilikti 3 paiyzǵa tómendettik.
Ekonomikamyzdy 22 ese ósirdik. Eldiń tabysy da osynsha ósti. Búgingi qazaqtyń tarihynda onyń jaǵdaiy men turmysy esh ýaqytta mundai bolǵan emes.
Bul – tarih turǵysynan qas qaǵym sát bolǵanmen, qazirgi tańda tutas dáýirge tatityn ýaqyt.
Elimizdiń bolashaqqa bastar baǵyty men maqsaty da aiqyn.
Biz bul joldan da óttik. Birinshi jolymyz – táýelsizdik alǵan qýanyshymyz boldy. Ekinshisi – 2030 jylǵa deiingi baǵdarlamamyz. Ony oryndadyq.
Endi úshinshi jol – 2050 jylǵa deiingi strategiiamyz. Onyń negizgi maqsaty – órkendegen eń úlken memleketter qataryna qosylý.
Eldigimizdi nyǵaitatyn 5 institýttyq reformany iske asyrý úshin «100 naqty qadam» Ult Josparyn oryndap jatyrmyz.
Qazaqstannyń úshinshi jańǵyrýyn jariialap, onyń 5 basymdyǵyn naqtyladyq.
Konstitýtsiialyq reformalar jasap, saiasi jańǵyrýdy júzege asyrýdamyz.
Bul jumystardyń ózegine ainalatyn Rýhani jańǵyrýdy qolǵa aldyq.
Oǵan qoǵamdyq sanany túbegeili ózgertip, jańa urpaq qalyptastyrýǵa baǵyttalǵan
6 joba negiz bolady.
Zaman óte tez jyljyp keledi. Qazir tehnika men innovatsiianyń artqan kezi. Jańalyqtar kún saiyn eselenýde.
Halyqtar zor básekelestik jolyna tústi. Solardyń qatarynda bolý úshin biz de qamdanýymyz kerek.
Birinshiden, qazaq tilin latyn álipbiine kóshirý.
Bul – ana tilimizdiń jahandyq ǵylym men bilimge kirigýin, ári álem qazaqtarynyń rýhani tutastyǵyn qamtamasyz etetin biregei qadam.
Muny aityp otyrǵan sebebim, qazir TMD aýmaǵyndaǵy qazaqtar kirill áripterin, Qytaidaǵy qandastarymyz tóte jazýdy, batys elderindegi baýyrlar latyn álipbiin qoldanýda.
Bárimiz sóileskende tilimiz bir bolsa da, oqyǵanda úsh túrli bolyp shyǵady. Eshbir kedergisiz túsinisetin bir qazaqtyń balasy bir-biriniń jazýyn uqpaityn kúige jetti.
Bul – jer júzine tarydai shashylǵan qazaqtyń keiingi urpaǵyn bir-birinen alshaqtatýda.
Kóp uzamai bul olqylyqtar birjola joiylady.
Qazaq tiliniń latyn álipbiine kóshýi birligimizdi nyǵaityp, rýhani jaqyndastyra túsedi.
Ekinshiden, gýmanitarlyq baǵyttaǵy eń úzdik 100 oqýlyqty qazaq tilinde shyǵarý.
Bul – qazaqstandyqtar úshin ǵana emes, kúlli qazaq úshin airyqsha mańyzdy joba.
Shet eldiń oqýlyqtaryn aldymen orysshaǵa, sosyn qazaqshaǵa aýdarǵansha kóp jyl ótedi.
Sondyqtan eń kerekti 100 kitapty qazaq tilinde shyǵarý máselesin alǵa qoiyp otyrmyz.
Endi qandastarymyz qai elde turǵanyna qaramastan dúniedegi eń tańdaýly bilimmen ana tilinde sýsyndai alady.
Qazir osynda san tilde sóileitin, tereń bilimdi kóptegen jastar otyr.
Sizderdi kúlli qazaqtyń órisin keńeitip, deńgeiin kóteretin aitýly jobaǵa belsene qatysýǵa shaqyramyn.
Joldaýymda muny 2025 jylǵa deiin júzege asyrý kerek degen meje qoiǵan bolatynmyn. Biraq ony soza berýdiń qajeti joq.
Ǵalymdarymyz bizge tiisti áripterdi tańdap berýge tiis.
Menińshe, esh qiyndyq joq. Sebebi, bizdiń balalarymyzdyń bári birinshi synyptan bastap aǵylshynsha oqidy.
Ósip kele jatqan urpaqqa ony igerý esh qiyn bolmaidy.
Úshinshiden, «Týǵan jer» jobasy árbir azamattyń jeri men eline qamqorlyq jasaýyn kózdeidi.
Men tarihi Otanyna septigin tigizgisi keletin qandastarymyz da kóp ekenine senimdimin.
Árqaisymyz óz múmkindigimizge qarai kindik qanymyz tamǵan týǵan jerimizge jaqsylyq istesek, búkil halyqtyń berekesi bolar edi.
«Týǵan jerin súie almaǵan, súie alar ma týǵan elin?» degen aqynnyń óleń joldary bar.
Shynynda da, otanshyldyq, otandy súiý týǵan jerińnen, týǵan aýylyńnan bastalady.
Sondyqtan «Týǵan jerge táý etý» degen uǵym qazaqqa tán nárse.
Aitalyq, Eýropadan dáriger qazaq kelip, bir baýyryna operatsiia jasasa, bul bar qazaqtyń jany bir ekenin kórsetpei me?
Nemese quryltaiǵa kelgen árbir qazaq Astanada aǵash otyrǵyzsa, ony jergilikti jurt qiyrdaǵy baýyrymnyń qoltańbasy dep baptap júrse qandai jarasymdy?!
Sheteldegi qazaq ónerpazy elde kontsert berse, qazaq ǵalymy tapqan jańalyǵyn engizip, kásipkerler jańa óndirister ashyp jatsa, el men eldiń qosylǵany osy emes pe?!
Jobany úilestirýshi organ Dúniejúzi qazaqtary qaýymdastyǵymen birlesip, bul baǵytta jumys isteýi kerek.
Tórtinshiden, qazaq úshin Atamekenniń bir shymshym topyraǵyna deiin tunyp turǵan qasiet.
Tutas túrkiniń altyn besigi Altai, kieli Túrkistan, ult uiasy Ulytaý jáne basqa da oryndar – barsha qazaq úshin qasietti.
Bul jerlerge shetelden san myń qazaq kelip, taǵzym etip júr.
Alaida, keiingi jastardyń eldegi tarihi, rýhani qundylyqtardan habary az.
«Qazaqstannyń kieli jerleriniń geografiiasy» jasalǵan soń, ol shettegi qazaqtarǵa da tanystyrylýy qajet.
Qaida júrsek te alty alashqa ortaq qundylyqtar bizdi biriktire túsedi.
Sondai-aq, qazaqtyń talai baǵa jetpes rýhani qazynalary Qazaqstannan tys jerde.
Biz bir jyldy «Ulttyq tarih jyly» dep jariialap, dúnie júzi boiynsha qazaq tarihyna qatysty qundylyqtardy izdestirdik.
Kóp dúnie jinaldy. Keiinnen «Mádeni mura» baǵdarlamasyn iske asyrdyq. Jańa kitaptar jazyp, qazaqtyń ataly sózderin, ánderin, filosoftar murasynyń jinaǵyn shyǵardyq.
Ǵalymdarymyz shetelderge jasaǵan ǵylymi saparlary arqyly kóptegen qundy muralarymyzben qaita tabystyrýda.
Jaqynda belgili ǵalymymyz 1,5 myń jyl buryn jasalǵan dombyrany taýyp, elge ákeldi.
Kóne túrki tilinde «jupar kúi áýeni súisindirdi» degen jazýy bar dombyra qazaq kúii 15 ǵasyr buryn uly óner deńgeiine kóterilgenin kórsetedi.
Qazaqstannan tysqary jerlerde mundai qundy jádigerler jetip artylady.
Arheologiialyq zertteýler jasaǵanda shettegi kieli oryndar men muralar nazardan tys qalmaýǵa tiis.
Besinshiden, Qazaqstandyq mádenietti álemge tanytatyn biregei joba bastaldy.
Onda otandyq mádeniettiń tańdaýly úlgileri álemniń basty tilderinde sóilep, barlyq qurlyqtarǵa jol tartady.
Sondai óner týyndylaryn taýyp, saraptap, Birikken Ulttar Uiymynyń alty tiline aýdaryp, dúnie júzine taratý kerek.
Qazaqstandyq mádeniet degenimiz – eń aldymen qazaqtyń mádenieti.
Endeshe, tól mádenietimizdi jer júzine tanytýǵa aǵaiyndar da atsalysýy kerek.
Qazaqstan halqy Assambleiasynyń XXV sessiiasyna sonaý Argentinada turatyn jerlesimiz kelip qatysty.
17 jyl buryn Almatydan kóshken nemis qyzy Qazaqstannyń mádeni ortalyǵyn quryp, ulttyq bairaq memorialynda kók týymyzdy jelbiretip júr.
Osyndai patriottar barshaǵa úlgi.
Altynshydan, «Qazaqstandaǵy 100 jańa esim» jobasy Táýelsizdik jyldarynda jetistikke jetken otandastarymyzdy elge tanystyryp, úlgi etýdi kózdeidi.
Biz 25 jyl ishinde ǵasyrǵa tatityn sharýa jasadyq. Qazaqstandy dúnie júzine pash ettik. Elimizdiń deńgeiin kóterdik.
Qazaqstannyń kóptegen bastamasy álemde qoldaý taýyp, iske asýda.
Osy jyldar ishinde barshaǵa belgili bolǵan otandastarymyz da az emes. Solardy iriktep, attaryn álemge tanytý kerek.
Árbir azamattyń tabys joly – elimizdiń damý jolynyń kórinisi.
Olardy alystaǵy aǵaiyn bilýi qajet.
Sondai-aq, ómir boiy syrtta júrse de, bilimi men biligi, óneri men daryny arqyly qazaqtyń atyn shyǵarǵan baýyrlaryn tarihi Otany tanýǵa tiis.
Qaýymdastyqqa álemdegi tanymal qazaqtardyń elektrondy bazasyn daiyndaýdy tapsyramyn.
Bul shette júrgen aǵaiynmen san túrli salada yntymaqtastyq ornatyp, barys-kelisti jandandyrýǵa jol ashady.
Rýhani jańǵyrý degen – búkil qazaqtyń jańǵyrýy, birlik degen – barsha qazaqtyń birligi.
Bul – negizgi másele. Bizdiń qol jetken tabysymyz el ishindegi tynyshtyq pen birliktiń arqasy.
Birligi joq elderde ne bolyp jatqanyn kórip otyrmyz. Qazaqtyń «Óser eldiń armany bitpes, óspes eldiń janjaly bitpes» degen ataly sózi bar.
Sondyqtan biz birlikti, sonyń ishinde qazaqtyń birligin saqtap kele jatyrmyz.
Tarihqa kóz salsaq, qazaqtyń jeńilip, bireýge bodandyqqa túsýi tek qana ishten ydyrap, birliginen aiyrylǵan kezde bolǵan.
Kerisinshe, qazaq birikken kezde jeńip otyrǵan. Osyny umytpaýymyz kerek.
Qazirgi jahandaný dáýirinde rýhani tutastyq qana qazaqty ǵasyrlar synynan súrinbei ótetin Máńgilik El etedi.
Qadirli baýyrlar!
Ótken 20-shy ǵasyr qazaq úshin qiianatty, óte aýyr ǵasyr boldy. 1921-1930 jyldardaǵy ashtyqta qazaqtyń teń jartysynan aiyryldyq.
Kezinde ondai jaǵdai bolmaǵanda, qazir qazaqtyń sany 50-60 millionnan asyp qalar edi.
Odan keiin repressiia boldy. 103 myń adam sottaldy. Qazaqtyń 65 myń betke ustar ziialysy tutqyndaldy. Onyń 25 myńy atyldy.
Qazaq úshin sóz aita alatyn adamdardyń tamyryna balta shabylyp, joiyp jiberildi. Sol qiynshylyqtar kezinde qazaqtar jan saýǵalap, dúnie júzine shashyrap ketti.
Myń ólip, myń tirilgen qazaq órkendep, qaita ósip keledi.
Qazir 5 millionnan astam qandasymyz shet memleketterde turyp jatyr.
Biz Táýelsizdik jyldarynda alystaǵy aǵaiyndy qoldaýdy esten shyǵarǵan emespiz.
Shetelden 1 millionǵa jýyq qazaqty elge kóshirip alyp, qoldan keler barlyq kómegimizdi jasadyq.
Búginde baýyrlarymyz Qazaqstannyń azamaty atanyp, el damýyna óz úlesterin qosýda.
Kelgen aǵaiyndardyń ishinde kóptegen tanymal ǵalymdar, daryndy sportshylar men óner maitalmandary bar.
Mysaly, boksshy Qanat Islam, ánshi Maira Muhamedqyzy, ǵalym Qarjaýbai Sartqojauly, Dúken Másimhan jáne basqa da kóptegen azamattardy ataýǵa bolady.
Sonymen birge, aǵaiyndar demografiialyq jaǵdai jaqsaryp, halyq sanynyń ósýine erekshe yqpal etti.
1991 jyly elimizde qazaqtardyń úlesi 40 protsenttei bolsa, qazir 70 protsentten astyq.
Qymbatty otandastar!
20 ǵasyrda Soltústik Kavkazdan 550 myń adam, Qiyr Shyǵys pen Koreiadan 100 myń adam, Reseidegi nemis ultynan 600 myń adam, evreiler men grekterden 1,5 milliondai adam kúshtep kóshirilip, jasandy túrde kóp ultty elge ainaldyq.
Táýelsizdik alǵan jyldarda 17 millionǵa tarta halqymyz bar edi. Odaq ydyrap, el sarsańǵa túskende, solardyń birazy elderine kóshti. Sodan biz 14 million bolyp qaldyq.
Alǵashqyda jyl saiyn 200 myńdai bala dúniege kelse, qazir jylyna 400 myńnan astam bala týady.
Men biylǵy 1 shildede halqymyzdyń sany 18 millionǵa jetedi dep jariialaimyn.
Qandastarymyzǵa memleket pen qoǵam tarapynan jan-jaqty qoldaý men kómek kórsetý úshin myna jumystar qolǵa alynýy tiis.
Birinshiden, shettegi jáne elge kóship keletin aǵaiyndy qoldaý úshin «Otandastar» qoryn quramyz.
Qazaq biznesmenderin osy qorǵa óz úlesterin qosýǵa shaqyramyn.
Muny uiymdastyrýdy Quryltai basshylyǵyna, Prezident Ákimshiligine jáne Úkimetke tapsyramyn.
Qaýymdastyqtyń ofisin Almatydan Astanaǵa kóshiretin kez keldi.
Ekinshiden, qurylǵan Qor Dúniejúzi qazaqtary qaýymdastyǵymen birlesip, otandastarǵa jan-jaqty qoldaý men kómek berýdiń is-sharalaryn anyqtap, soǵan sáikes keshendi baǵdarlama ázirlesin.
Ol baǵdarlamada qazaqtyń kóshi men alystaǵy aǵaiynmen bailanystyń barlyq máseleleri qamtylýy kerek.
Baǵdarlamanyń basymdyqtary men mindetteri qor arqyly iske asyrylatyn bolady.
Úshinshiden, elim, jerim dep emirengen árbir qazaqqa Qazaqstannyń esigi árqashan aiqara ashyq. Eshkimge shekteý joq.
Biz kóship keletin aǵaiynǵa jol silteýdi turǵylyqty jerinen bastaýymyz kerek.
Elshilikter azamattardyń qujatyn qamdap, qonystanatyn jeri týraly keńes berýge tiis. Ony Syrtqy ister ministrligine tapsyramyn.
Sonda shekaradaǵy shyrǵalań da, elge kelgen soń qujat túgendeý úshin ary-beri sabylý da bolmaidy.
Qytai qazaqtarynyń sottalmaǵany týraly anyqtama alýy jaiy, aǵaiynnyń arǵy bettegi eńbek ótili eseptelmeýi siiaqty problemalar bar.
Úkimetke osynyń bárin keshendi túrde qaita qarap, sheshimin tabýdy tapsyramyn.
Tórtinshiden, jastarǵa qoldaý kórsetý.
Biz sheteldegi qazaq balalarynyń Qazaqstanda bilim alýyna jaǵdai jasaýymyz kerek.
Qazir olar memlekettik grantpen elimizdiń joǵarǵy oqý oryndarynda oqi alady.
Úkimetke otandastarymyzdyń joǵary bilim alýyn qoljetimdi etý úshin olarǵa bólingen kvotany 2 esege kóbeitýdi tapsyramyn.
Qazir bilim men ǵylymǵa kóp kóńil bólip jatyrmyz. Osy jyldar ishinde 1 500 mektep salyndy. Ziiatkerlik mektepter men joǵary oqý oryndaryn saldyq.
Sheteldik qazaq stýdentteri úshin bilimine qarai arnaiy stipendiialyq baǵdarlama engizý kerek.
Qai eldiń azamaty bolsa da elde oqyǵan qazaq balasy erteń Qazaqstanǵa qyzmet etetinin este saqtaǵan jón.
Besinshiden, syrtta júrgen baýyrlardyń bir bóligi, ásirese, jastar assimiliatsiiaǵa túsip, ana tilin umytyp barady.
Biz buǵan ara túsýge tiispiz.
Úkimet sheteldegi qandastarymyz yqsham ornalasqan óńirlerde olardyń ana tilinde bilim alý múmkindikterin qarastyrýy kerek.
Qysqa merzim ishinde qazaq diasporasyn gýmanitarlyq baǵyttaǵy ádebiettermen, oqýlyqtarmen, ádistemelik quraldarmen qamtamasyz etýdi tapsyramyn.
Altynshydan, alystaǵy aǵaiyn elden turaqty habar alyp, bailanysta bolǵysy keledi. Qazaqstanda ne bolyp jatqanyn bilip, atqarylyp jatqan isterdi kórgisi keledi.
Qazir sheteldik kórermenderge arnalǵan KazakhTV telearnasy qandastarymyz turatyn aimaqtardyń birazyn qamtidy.
Biraq, bul jetkiliksiz.
Úkimetke memlekettik telearnalardy irgeles elderde kórsetý múmkindikterin qarastyrýdy júkteimin.
Bul merzimdi baspasózge de qatysty.
Jetinshiden, kez-kelgen memleket kásibi, bilimdi, jańashyl mamandarǵa muqtaj.
Men tarihi Otanyma eńbek sińiremin, onyń damýyna úles qosamyn degen árbir talantty qazaqty elge shaqyramyn.
Úkimet osyndai azamattardy elge tartyp, mamandyǵyna, múmkindigine qarai jaǵdai jasaýdyń tetikterin qarastyrsyn.
Segizinshiden, biz arnaiy baǵdarlama qabyldap, ońtústiktiń turǵyndaryn soltústikke kóshirip jatyrmyz.
Aǵaiyndar eńbek kúshi az teriskei jaqqa qonystanýǵa yntaly bolýy kerek.
Bul úshin kóship kelýshilerdiń jańa ortaǵa neǵurlym tez beiimdelýine jaǵdai jasaýǵa tiispiz.
Ol jaqta beiimdeý ortalyqtary jumys isteýi qajet.
Kelgen aǵaiyndy qonystandyratyn úiler salyp, áleýmettik infraqurylym jasaý kerek. Ony baǵdarlama túrinde qolǵa alýymyz qajet.
Olardyń qajetti mamandyq alýyna járdem berilip, jumyspen qamtýdyń jol kartasy jasalsyn.
Osynyń bári – ultymyzdyń, elimizdiń jarqyn bolashaǵy úshin atqarylatyn mańyzdy sharalar bolmaq.
Ardaqty aǵaiyn!
Biz sizderdiń kelgenderińizge qýanamyz. Atajurtqa tarihi otanymyz bar dep kelip otyrsyzdar.
Sondyqtan, dúnie júzindegi qazaqtardyń basy qosylyp, elimizdiń órkendeýine atsalyssa eken deimin. Birligimiz ajyramasyn.
Qaýymdastyq qurylǵan kúnnen bastap oǵan ózim tóraǵalyq etip kelemin.
Men úshin shette júrgen baýyrlarǵa janashyr bolý – árbir qazaqstandyqqa qamqorlyq jasaýmen birdei mańyzdy.
«Ár qazaq – meniń jalǵyzym» degen óleń jolyn quryltai minbesinen álemdegi árbir qazaqqa joldaimyn.
Sizderge aitarym, alystaǵy aǵaiynǵa meniń duǵai sálemimdi jetkizińizder.
Qazaq balasy qai elde tursa da Uly Dalada Máńgilik El quryp jatqan baitaq Qazaqstannyń ajyramas bólshegi ekenin júreginiń tórinde ustasyn!
Quryltai kúnde bolyp jatqan joq.
Asyqpai Atamekende aýnap-qýnap, ásem Astanany kórińizder.
Álem nazaryn tikken EKSPO-ny tamashalańyzdar. Oǵan 115 memleket pen 22 halyqaralyq uiym qatysýda.
Biz eki-úsh jyldyń ishinde Astananyń bir aýdanyn salyp shyqtyq.
Bul sapar elmen etene tanysyp, oi túier jemisti sapar bolsyn.
Búgin barsha qazaqtyń basyn biriktirer salmaqty oilar aitylyp, izgi ister bastaý alaryna senimdimin.
Eki kúnnen soń barsha musylmandar úshin qasietti ait merekesi bastalady.
Biz umytylyp kete jazdaǵan ata dinimizdi qaitaryp, Qazaqstanda 2,5 myńnan astam meshit ashtyq. Eldi imandylyqqa shaqyryp kelemiz.
Biz ekstremizm men terrorizmge qarsy elmiz. Zaiyrly memleketpiz. Sol joldy ustanamyz. Órkenietke, ǵylym men bilimge qol sozǵan elmiz.
Ait qabyl bolsyn, jaratqan Qazaqqa jar bolsyn!
Qazaqstannyń táýelsizdigi máńgilik bolsyn!
Bizdiń kók bairaǵymyz máńgi jelbirei bersin!
* * *
Qurmetti otandastar!
Dúnie júzindegi qazaqtar sany basqa eldermen salystyrǵanda kóp emes. Degenmen, eldiń deńgeii halqynyń kóptigimen nemese azdyǵymen ólshenbeidi. Eldiń sińirgen eńbegimen, sol elden shyqqan belgili adamdar men ǵalymdardyń jetistikterimen ólshenedi.
Sondyqtan, bar qazaqtyń basyn biriktirý – meniń Elbasy retindegi paryzym! Senimderińizge rahmet!
Qazaqstan – bárimizdiń ortaq Otanymyz.
Syrttaǵy aǵaiyn árdaiym kóńilimizdiń tórinde.
Búgin kóptegen máselelerdi talqyladyq. Usynystaryńyzdyń barlyǵy eskeriletin bolady.
Men Úkimetke birqatar tapsyrmalar berdim, ol meniń baqylaýymda bolady.
Jalpy, bul quryltaidyń bereri az emes dep sanaimyn.
Qazaqta «barmasań, kelmeseń jat bolarsyń» degen sóz bar.
Sondyqtan, tek qana quryltaiǵa emes, ár ýaqytta kelip turyńyzdar. Bizdiń esigimiz árdaiym ashyq.
Shettegi árbir qandasymyz – qazaq eliniń bir túiirshigi.
Sizder eki el arasyndaǵy dáneker bolasyzdar.
Sheteldegi qazaqtar elge jii kelip, týǵan jerge tamyr bekitip turǵany durys.
Sizder elge kelip kózaiym bolsańyzdar, men de syrttaǵy jastarymyzdyń oi órisin, bilim deńgeiin, bastysy, qazaqy bolmystaryn kórip, kóńilim tolyp otyr.
Osy qalyptan tanbańyzdar.
Qaida júrseńizder de, arqa súier Atamekendi, búkil qazaq qasiet tutar Qazaqstandy júrek tórine saqtap júrińizder.
Sonda ózderińiz de, urpaqtaryńyz da máńgi qazaq bolyp qalasyzdar.
Qazaq bolý – mártebe, maqtanysh, qazaq bolý – jaratqannyń syiy!
Osyny bárimiz de baǵalai bileiik!
Biz sizderge tilekshimiz, árkez birgemiz.
Bárińizdi ata-babalar arýaǵy qoldasyn!
Elimiz aman, irgemiz tynysh bolsyn!
Kók bairaǵymyz biikte jelbiresin!
Qazaqstannyń Máńgilik el bolýyna birlese atsalysaiyq!
