16 mamyrda Nur-Sultanda baspana máselesine shaǵynyp, narazylyqqa shyqqan ondaǵan anany qala ákimi Baqyt Sultanov qabyldady. Analar baspana kezeginiń baiaý jyljitynyna, bankterdiń úi alý úshin alǵashqy jarna tóleý talaby baryna shaǵyndy. Jiynda eńbek vitse-ministri Svetlana Jaqypova men ákimdik ókilderi otyrdy, dep habarlaidy Azattyq.
Narazylar baspana men ataýly áleýmettik kómek siiaqty máseleler boiynsha kezektese suraq qoidy. Jinalǵandardyń keibiri baspana alý úshin bankke alǵashqy jarna tóleý talabyn alyp tastaýdy surady. Sultanov "Alǵashqy jarna tóleý talabyn alyp tastaý - bankti quldyratý degen sóz" dedi. Baspana kezeginiń baiaý jyljitynyna shaǵynan analarǵa Sultanov "máseleniń sheshilip jatqanyn" aityp jaýap berdi.
- Kezekte turǵandarǵa beriletin baspana sanyn kóbeitýge tyrysamyz. Úkimet túrli baǵdarlamalar arqyly Almaty da, Shymkentte de osy máseleni sheshýge tyrysyp jatyr. Sebebi bizde másele rasymen kóp. Kezekke tura almai jatqandar da bar, - dedi ákim.
Qala ákimi baspasóz qyzmetiniń habarlaýynsha, jiynǵa 70-ke tarta ana kelgen. Olar Sultanovtyń atyna jeke basyndaǵy máselesin jazyp berýi úshin ákimdik narazylarǵa paraq taratyp bergen.
Jarty saǵattai ýaqyttan soń ákimdik ókilderi "Jiyn ary qarai baspasózdiń qatysýynsyz ótedi" dep jýrnalisterdi shyǵaryp jiberdi.
Analar narazylyǵy búgin, 16 mamyrda tańerteń bastalǵan. Áýeli Nur-Sultan ákimdigi aldyna kelgen analar ózderine eshkim shyqpaǵan soń, Qazaqstan prezidenti Qasym-Jomart Toqaev pen eks-prezident Nursultan Nazarbaev qatysqan ekonomikalyq forým aldyna barǵan. "Baspana!", "Ana men bala quqyǵy qorǵalsyn!" dep jiyrma minýttai aiqailap, Nazarbaevpen kezdesýdi talap etken analarǵa eńbek ministri Berdibek Saparbaev pen qala ákimi Baqyt Sultanov shyqqan. Olar analarmen birge avtobýsqa otyryp, ákimdikke qaityp keldi. Azattyq tilshisiniń aitýynsha, Saparbaev ákim qabyldaýy bastalǵanda ketip qalǵan.
Eske sala keteiik, 2019 jyly 4 aqpanda Astananyń Kóktal-1 shaǵyn aýdanyndaǵy Shyńǵystaý kóshesinde ornalasqan jeke úidiń aýlasyndaǵy ýaqytsha baspana órtenip, bir otbasyndaǵy bes bala opat bolǵan. Osy oqiǵadan keiin Qazaqstanda kóp balaly analar narazylyǵy kúsheigen.
