Memleket basshysy Jańa Zelandiianyń General-gýbernatory Petsi Reddige kóńil aitý jedelhatyn joldady, dep habarlaidy Aqorda.
Qazaqstan Prezidenti Kraistcherch qalasyndaǵy lańkestik áreket saldarynan kóptegen adamnyń qaza bolǵany týraly habardy zor kúizelispen qabyldady.
«Biz jahandyq qaýipsizdik pen beibitshilikke qater tóndiretin terrorizm men ekstremizmniń kez kelgen túrin qatań aiyptaimyz.
Qazaqstan bizdiń elderimizdiń beibit ómiri men qaýipsizdigin qamtamasyz etý úshin qazirgi zamannyń qaýip-qaterlerine qarsy yntymaqtastyqty jalǵastyrýǵa árqashan daiyn», - delingen jedelhatta.
Nursultan Nazarbaev Qazaqstan halqynyń jáne jeke óziniń atynan qaza bolǵandardyń jaqyndary men týǵan-týystaryna kóńil aitty, sondai-aq zardap shekkenderdiń tezirek saýyǵyp ketýine tilektestik bildirdi.
