Qazaqstannyń Tuńǵysh Prezidenti Nursultan Nazarbaev «Bir beldeý, bir jol» ekinshi halyqaralyq yntymaqtastyq forýmynyń sessiiasynda sóilegen sózinde qazirgi zamanǵy jahandyq syn-qaterlerge tótep berýdiń joldary týraly aitty.
Elbasy kiber qaýipsizdik pen qoldanystaǵy kommýnikatsiianyń qaýipsizdigin qamtamasyz etýdiń ózektiligin jáne óńiraralyq deńgeidegi básekeniń arta túskenin atap ótti.
– Damýdy jáne qaýipsizdikti qamtamasyz etetin jahandyq institýttardyń tiimdiligine qatysty suraqtar týyndaýda. Ekonomika salasynda «saýda teke-tiresi men sanktsiialyq soǵystar» paida boldy. Búkil álem boiynsha porttar men áýejailardyń terminaldary arqyly jóneltiletin júkter kidire bastady. Túptep kelgende, bul álem ekonomikasynyń damý qarqynyn báseńdetip, halyqtyń, ásirese, damýshy elder turǵyndarynyń jaǵdaiyn nasharlatady, – dedi Nursultan Nazarbaev.
Elbasy álemdik qoǵamdastyqty adamzattyń jahandyq problemalaryn sheshý úshin jumylýǵa shaqyrdy.
– Alyp qurlyǵymyzdyń dál ortasynda ornalasqan Qazaqstan Eýraziiada tyǵyz seriktestik ornatýdy árdaiym qoldaidy. Bizdiń syrtqy saiasi doktrinamyz kóp jaqty yntymaqtastyqty jáne birlese damýdy, senim men qaýipsizdikti nyǵaitýdy kózdeidi. Biz búkil álemge halyqaralyq kún tártibindegi eń kúrdeli máselelerdi talqylaý boiynsha da úlgi kórsete aldyq, – dedi Nursultan Nazarbaev.
Qazaqstannyń Tuńǵysh Prezidenti elimizdiń iadrolyq qarýsyzdaný jáne jappai qyryp joiatyn qarýdyń taralýyn boldyrmaý isindegi jetistikterine toqtaldy.
– Biz geosaiasat pen geoekonomikada keiinge qaldyrýǵa bolmaityn mindetterdi sheshýge septigin tigizetin jahandyq arhitektýrany qalyptastyrý isine aldaǵy ýaqytta da atsalysa beremiz. Meniń oiymsha, muny «Úsh D» jańa ahýalyn qalyptastyrý arqyly júzege asyrýǵa bolady. Muny «Úsh dialog» júrgizý qajettigi dep túsingen jón. Birinshisi jahandyq deńgeidi qamtidy. Bul – AQSh, Resei, Qytai jáne Eýropa odaǵy arasyndaǵy dialog, – dedi Elbasy.
Nursultan Nazarbaev ekinshi dialogtyń Eýraziia deńgeiinde qajettigin atap ótti. Ondaǵy maqsat – Aziiadaǵy ózara is-qimyl jáne senim sharalary jónindegi keńes pen Eýropadaǵy qaýipsizdik jáne yntymaqtastyq uiymynyń áleýetin biriktirý.
– Úshinshi dialog – bul Eýraziia ekonomikalyq odaǵy, Eýropa odaǵy, Shanhai yntymaqtastyq uiymy jáne Ońtústik Shyǵys Aziia elderi qaýymdastyǵy arasyndaǵy júieli ekonomikalyq dialog. Osyndai formattaǵy ekonomikalyq kooperatsiiany damytý arqyly, birinshiden, elderimizdiń damýyna jáne azamattarymyzdyń ál-aýqatynyń artýyna zor serpin beremiz. Ekinshiden, ekonomikany ártaraptandyrýdyń jańa kózderin ashýǵa, básekege qabilettilikti nyǵaitýǵa, biznes ahýalyn jaqsartýǵa jáne memleketterdiń investitsiialyq tartymdylyǵyn arttyrýǵa jaǵdai jasalady. Úshinshiden, Úlken Eýraziianyń jahandyq rólin arttyrýǵa múmkindik týyndaidy, – dedi Qazaqstannyń Tuńǵysh Prezidenti.
Sońynda, Elbasy atalǵan úsh dialogtyń bastalýy forýmǵa qatysýshylardyń barlyǵynyń múddelerine sai keletinin atap ótip, birikken Eýraziianyń jarqyn bolashaǵy úshin ózara bailanystar ornatýdyń qajettiligi týraly aitty.
