Búgin «Nur álem» kórme kesheninde Qazaqstan prezidenti Nursultan Nazarbaevtyń qatysýymen Jastar jylynyń ashylý rásimi ótip jatyr. «Táýelsizdiktiń urpaqtary» dep atalatyn saltanatty sharada elimizdiń betke ustar jastary bas qosyp, sóz sóiledi.
Jiynda jastardy tyńdaǵan Memleket basshysy «sózdi toqtatpai, aita bersin degen oi keldi» dedi. Elbasy Jastar jylynyń mańyzdylyǵyn atap ótti.
«Jastar, sender men aitaiyn degen negizgi máseleniń barlyǵyn ár salada kóterip jatyrsyńdar. 27 jyl táýelsizdiktiń ishinde kóp nárse jasadyq, kóp jeńiske jettik. Táýelsizdik Qazaqstandy ornatyp, memleketti dúniejúzi kartasyna qoidyq. Bul aýqymda, bul shekarada dál osyndai jaǵdaida Qazaqstan esh ýaqytta bolǵan joq. Buryn dúniejúzi barlyǵyn pash etken, moiyndaǵan, qadirlegen el bolǵanymyz joq. Sondyqtan, ata-babymyz armanymyzdy oryndap, bizdiń búgingi táýelsizdigimizdi ornatty», - dedi Nazarbaev.
Prezidenttiń aitýynsha, saiasatqa kelgen árbir adamnyń, ásirese el basqaramyn degen úmiti bar azamattardyń halyqqa joldaityn ishki oiy, jospary bolýy kerek.
«Sol jospardy iske asyryp, nátijesin kórgen saiasatker baqytty. Istep jatqan jumystyń barlyǵyn aita berýge bolady. Elimizdi qurdyq, ekonomikany kóterdik, halyqtyń ál-aýqatyn joǵarylattyq, mádenietin, densaýlyǵyn, barlyǵyn kóterdik. Dúniejúzi tań qalatyn Astanany saldyq. Biraq ta, ishindegi eń negizgi jetistik – senderdi, jańa býyn qazaqstandyqtardy tárbielep shyqtyq. Jańa býyn - Qazaqstannyń eń úlken jetistigi, meniń Memleket basshysy retindegi eńbegimniń eń úlken jemisi», - dedi Elbasy.
Aita keteiik, elordadaǵy «Nur álem» pavilonynda Elbasy Nursultan Nazarbaevtyń qatysýymen «Táýelsizdik urpaqtary» atty jastar jylynyń saltanatty ashylý rásimi ótip jatyr.
QR Prezidenti Nursultan Nazarbaev Qazaqstan halqyna ótken jylǵy Joldaýynda 2019 jyldy Jastar jyly dep jariialaýdy usynǵan bolatyn. Prezident óz sózinde jastardyń barlyq sanatyn qoldaýǵa arnalǵan sharalardy tolyq qamtityn áleýmettik satynyń aýqymdy platformasyn qalyptastyrý kerektigin aitqan edi. Al, arada bir aidan astam ýaqyt ótkende Elbasy Jarlyǵymen 2019 jyl Jastar jyly dep jariialandy.
