Nazarbaev Ýniversiteti Túrkistan taýlaryna saiahat barysynda qaza tapqan stýdentteriniń otbasyna, týǵan-týystary men dostaryna kóńil aitty, dep habarlaidy "Ult aqparat".
«Eki stýdentimizdiń qaiǵyly jaǵdaida qaza tapqany týraly aqparatty zor kúizelispen qabyldadyq. Olar Túrkistan oblysynyń taýlaryna saparǵa attanǵan, quramynda 7 adam týristik toptyń ishinde bolǵan edi. Stýdentterimizdiń otbasylaryna, týǵan-týystary men dosparyna shyn nietten kóńil aitamyz. Nazarbaev Ýniversiteti óz tarapynan qaza tapqandardyń otbasyna qajetti barlyq kómek kórsetip, qoldaý bildiretin bolady. Bul biz úshin azaly kún. Toptyń qalǵan músheleri jaqyn arada din aman tabylatyndyǵyna úlken senim artamyz», - delingen ýniversitettiń baspasóz qyzmeti taratqan kóńil aitýda.
Eske salaiyq, Tólebi aýdanynyń Sairam-Ógem memlekettik ulttyq tabiǵi parkiniń aýmaǵynda 7 adamnyń joǵalǵany týraly habarlama 2021 jylǵy 25 mamyrda 18 saǵat 30 minýtta kelip tústi. Olardyń úsheýi keshe tabylǵan bolatyn. 21 mamyrda týrister jaiaý «Sary-aiǵyr» shatqalyna bet alǵan jáne 24 mamyrda qaitý qajet bolǵan. Alaida qaitar jolda adasyp ketken. Al búgin týristik toptyń 2 múshesiniń múrdesi tabylǵany habarlandy.
