Nursultan Nazarbaev UQK-nyń qyzmet atqarýda qaza tapqan qyzmetkerleriniń áielderi men balalaryna qoldaý kórsetýdi tapsyrdy. Bul týraly Memleket basshysy Ulttyq qaýipsizdik qyzmetkerleriniń kásibi merekesine orai ótken saltanatty jiynda aitty, - dep habardaidy kaz.tengrinews.kz tilshisi.
13 shildede QR Ulttyq qaýipsizdik komitetiniń qurylǵanyna 25 jyl toldy.
"Ulttyq qaýipsizdik komitetiniń tarihy naǵyz batyrlyqtyń, eli men halqyna degen adaldyqtyń úlgilerine bai. 25 jyldyq mereitoidy atap óte otyryp, týǵan jerinde turaqtylyq pen beibitshilikti saqtaý jolynda qaza tapqan Otanynyń naǵyz patriottaryn eske alýǵa mindettimiz. Qyzmetterińiz osyndai. Amal ne, osyndai qaterge bas tigesizder, osy qyzmetke óz erikterińizben barasyzdar. Bul qyzmette túrli jaǵdai bolady - eldiń turaqtylyǵy men tynyshtyǵyn keýdelerińizben qorǵaisyzdar. Elimizdiń táýelsizdigi men tynyshtyǵy úshin janyn bergen azamattarymyz bar", - degen Nursultan Nazarbaev UQK-nyń qaza tapqan qyzmetkerlerin eske alý úshin bir minýt únsizdik jariialady.
"Osy zalda qaza tapqan qyzmetkerlerdiń áielderi otyr. Osy sózderdi olarǵa arnaimyz. Olar árdaiym Ulttyq qaýipsizdik qyzmetiniń, iaǵni memlekettiń nazarynda bolýy tiis, balalary da. Bul - bizdiń ortaq mindet", - dep málimdedi Qazaqstan Prezidenti.
Memleket basshysy Beibitshilik jáne kelisim saraiynda TMD elderiniń arnaiy qyzmet ókilderi otyrǵanyn, olardyń Astanaǵa UQK-nyń qurylǵanyna 25 tolýyna orai kelip otyrǵanyn atap ótti.
"Dostastyq elderiniń qaýipsizdik organdarynyń basshylaryna qazaqstandyq áriptesterimen etene ári jemisti árekettestigi úshin alǵys aitamyn. Qoldaýlaryńyzdy, áriptestikterińizdi joǵary baǵalaimyz, sebebi elderimizdiń qaýipsizdigi, transshekaralyq búgingi qaterler men syndardy esepke alǵanda, ortaq isimiz. Jalqy bir memleket, meili ol Amerika nemese basqalary siiaqty myqty bolsyn, ózin qorǵai almaidy, sondyqtan munda ortaq múdde qajet. Kórshi elderdiń arasyndaǵy ózara túsinisý men senim óte mańyzdy", - dep pikir bildirdi Qazaqstan Prezidenti.
Qurmetti meimandar arasynda respýblikamyzdyń áleýetti jáne quqyq qorǵaý qurylymdarynyń, ministrlikteri men vedomstvolarynyń basshylarymen qatar, shetel arnaiy qyzmetteri delegatsiialarynyń basshylary resmi ókilderi jáne ardagerleri boldy.
Sóz sóileý barysynda Memleket basshysy ulttyq qaýipsizdik organdary óz qyzmetiniń alǵashqy kúnderinen bastap jańa ishki jáne syrtqy saiasi jaǵdaidy eskere otyryp, el basshylyǵyna memleket qurýdyń basym baǵyttaryndaǵy asa mańyzdy máselelerdi sheshýde qarqyndy járdem kórsetkenin atap ótti. Memleket basshysy sondai-ak ulttyq qaýipsizdik organdarynyń barlyq jeke quramy men ardagerlerin kásibi merekelerimen quttyqtady jáne vedomstvonyń jekelegen qyzmetkerlerine joǵary memlekettik nagradalar tapsyrdy.
Saltanatty is-shara derekti film kórsetý jáne kontserttik baǵdarlamaǵa ulasty.
.jpeg)