Elbasy Nursultan Nazarbaev QR Premer-Ministri Baqytjan Saǵyntaevty qabyldady, - dep habarlaidy "Ult aqparat" Aqordanyń baspasóz qyzmetine silteme jasap.
Kezdesý barysynda Memleket basshysyna biylǵy 7 aidyń qorytyndysy boiynsha Úkimettiń atqarǵan jumysy jóninde esep berildi.
Qazaqstan Prezidenti elimizdiń ekonomikalyq damý kórsetkishteri ósip kele jatqanyn aityp, memlekettik jáne salalyq baǵdarlamalardy odan ári iske asyrýdyń mańyzdylyǵyn atap ótti.
– Meniń tapsyrmam boiynsha elimizdiń birneshe óńirin aralap shyqtyńyz. Jalpy, turaqty ahýal baiqalýda. Aldymyzda egin orý naýqany tur. Ony tiisti deńgeide júrgizýimiz qajet, – dedi Elbasy.
Nursultan Nazarbaevqa 7 aidyń qorytyndysy boiynsha ekonomikanyń damý barysy jáne baǵdarlamalardyń aralyq nátijeleri jóninde málimdeldi.
– Ekonomikalyq ósim 4,2%-dy qurap otyr. Óndiris salasyndaǵy kórsetkishter munai óńdeý deńgeii tómendegen Qyzylorda jáne Mańǵystaý oblystarynan basqa elimizdiń barlyq óńirinde 100 paiyzdyq mólsherden asty. Biz qazirgi ýaqytta bul óńirlerge jańa rezerv kózderin jumyldyrý máselesi boiynsha jumystar júrgizip jatyrmyz.
Negizgi kapitalǵa investitsiia tartý máselesi jóninde. Byltyrǵy osy kezeńmen salystyrǵanda 3,7% ósim baiqalýda.
Barlyq óńirlerde kórsetkishter jaqsy. Infliatsiia deńgeii biylǵy maýsym aiymen salystyrǵanda 0,1%-ǵa ósti. Azyq-túlik baǵasy 0,5%-ǵa tómendegenin atap ótkim keledi. Jumyssyzdyq deńgeii 4,9%-dy qurap otyr, – dep baiandady B.Saǵyntaev.
Sonymen qatar, Premer-Ministr indýstriialandyrý baǵdarlamasynyń iske asyrylýy jóninde esep berdi. Onyń aiasynda biylǵy birinshi toqsannyń qorytyndysy boiynsha 31 joba iske qosyldy. B.Saǵyntaevtyń málimetine sáikes, ekinshi toqsanda jańa 10 myń jumys ornyn qamtityn 100 jobany iske asyrý josparlanyp otyr.
– Ekonomikanyń ósýine «Nurly jol» baǵdarlamasynyń iske asyrylýy zor úles qosyp otyr. Biyl avtomobil joldarynyń qurylysyna 356 milliard teńge qarastyrylǵan. Sondai-aq, qazir 600 shaqyrym jol iske qosyldy. Jyl sońyna deiin 469 shaqyrym jol aqyly bolmaq. Alǵash ret osyndai júiege qosylǵan «Astana-Býrabai» tas joly jylyna 1,5 milliard teńgege deiin paida ákelip, onyń qurylysyna jumsalǵan qarajatty aqtap otyr. Qazir «Astana-Temirtaý» tas jolyn osy júiege qosý jumystary júrgizilýde, – dedi Premer-Ministr.
Sondai-aq, B.Saǵyntaev «Nurly jer» baǵdarlamasynyń oryndalý nátijeleri týraly baiandady. Onyń aiasynda biyl 10,2 mln sharshy metr turǵyn úi salý josparlanǵan. Premer-Ministrdiń málimetine sáikes, birinshi jartyjyldyqtyń qorytyndysy boiynsha 5,5 mln sharshy metrdi qamtityn qurylys jumystary aiaqtalǵan.
Memleket basshysyna aýyl sharýashylyǵyndaǵy baǵdarlamalardyń iske asyrylýy týraly esep berilip, el ekonomikasyn nesielendirý jóninde málimet usynyldy.
Sońynda Qazaqstan Prezidenti Úkimet pen ákimderdiń aldyna qoiylǵan mindetterdi oryndaýdy jalǵastyrýdy tapsyryp, bul rette ósimniń oń qarqynyn saqtaýdyń jáne bólingen qarajatty igerýdiń mańyzdylyǵyna toqtaldy.
– Úkimet qyzý jumys júrgizip otyr dep esepteimin. Men jyldy jaqsy nátijelermen qorytyndylaý úshin bárińizdi uiymshyldyqpen jumys isteýge shaqyramyn. Táýekeldi tustar da joq emes. Energiia tasymaldaýshylarymyzǵa, shikizat ónimderine degen baǵanyń ózgerisi. Bálkim, batystyń Reseige qatysty sanktsiialary áser eter. Osyny eskerý qajet, – dedi Elbasy.
.jpeg)