Memleket basshysy «Samuryq-Qazyna» ulttyq ál-aýqat qoryn basqarý jónindegi keńestiń otyrysyn ótkizdi, dep habarlaidy "Ult aqparat" Aqordaǵa silteme jasap.
Jiynǵa Premer-Ministr B.Saǵyntaev, Prezident Ákimshiliginiń Basshysy Á.Jaqsybekov, Ulttyq bank tóraǵasy D.Aqyshev, «Samuryq-Qazyna» aktsionerlik qoǵamy basqarmasynyń tóraǵasy A.Esimov, Premer-Ministrdiń orynbasarlary A.Mamin jáne A.Jumaǵaliev, Prezidenttiń kómekshisi Á.Smaiylov, Investitsiialar jáne damý ministri J.Qasymbek, Ulttyq ekonomika ministri T.Súleimenov, Qarjy ministri B.Sultanov, Energetika ministri Q.Bozymbaev, «Samuryq-Qazyna» aktsionerlik qoǵamynyń táýelsiz direktory R.Evans, ulttyq kompaniialar men kásiporyndardyń jetekshileri qatysty.
Basqosý barysynda «Samuryq-Qazyna» aktsionerlik qoǵamynyń jańarǵan damý strategiiasy men Qordy transformatsiialaý baǵdarlamasyn qabyldaý máseleleri talqylandy.
Kezdesýdi ashqan Qazaqstan Prezidenti ulttyq ekonomikamyzdy nyǵaitý jáne odan ári damytý isinde «Samuryq-Qazyna» ál-aýqat qorynyń jumysy strategiialyq mańyzǵa ie bolyp otyrǵanyn atap ótti.
– «Samuryq-Qazyna» ulttyq ál-aýqat qory el ekonomikasynda mańyzdy ról atqarady. Qordy damytý jónindegi alǵashqy uzaq merzimdi strategiia 2012 jyly qabyldandy. Ol álemdik qarjy daǵdarysynyń saldaryna qarsy turý maqsatymen ázirlengen bolatyn. Sońǵy jyldary ahýal ózgerdi. Ekonomikamyz syrtqy faktorlardyń áserine tótep berip, ornyqty damý jolyna tústi. Kóp jumys atqaryldy, – dedi Elbasy.
Nursultan Nazarbaev Qordy damytý úshin atqarylǵan jumystarǵa oń baǵa berip, buǵan deiin qabyldanǵan baǵdarlamalardy qazirgi jaǵdailarǵa sáikes jańartý qajettigin aitty.
– Biz ekonomikamyzdy úshinshi jańǵyrtý jolyna túsip, tsifrlandyrý jónindegi jumystarǵa belsendi túrde kiristik. Elimizdiń 2025 jylǵa deiingi damý strategiiasy qabyldandy. Osy oraida, «Samuryq-Qazyna» ulttyq ál-aýqat qorynyń jańa damý strategiiasyn da qabyldaý qajettiligi týyndap otyr. Sondai-aq, Qordy transformatsiialaý baǵdarlamasyn jańartý qajet. Bul baǵdarlamanyń nátijeleri Qor kompaniialarynyń qyzmetinde de kórinýge tiis, – dedi Memleket basshysy.
Otyrys barysynda «Samuryq-Qazyna» aktsionerlik qoǵamy direktorlar keńesiniń tóraǵasy – Premer-Ministr B.Saǵyntaevtyń, «Samuryq-Qazyna» aktsionerlik qoǵamy basqarmasynyń tóraǵasy A.Esimovtiń, «Samuryq-Qazyna» AQ táýelsiz direktory R.Evanstyń esepteri tyńdaldy. Jiynǵa qatysýshylarǵa «Samuryq-Qazyna» aktsionerlik qoǵamynyń 2018-2028 jyldarǵa arnalǵan jańarǵan damý strategiiasy jáne Transformatsiialaý baǵdarlamasy tanystyryldy. Adami kapitaldy damytý jáne Qordyń kadr áleýetin tiimdi paidalaný máselelerine erekshe nazar aýdaryldy.
Nursultan Nazarbaev baiandamashylardy tyńdap, jiynǵa qatysýshylardyń nazaryn tiisti sharalar qabyldaýdy qajet etetin birqatar máselege aýdardy.
– Qordy basqarýdyń tiimdiligin arttyrý máselesine toqtalaiyq. Qor kompaniialaryn basqarýdyń kóp deńgeili júiesi áli kúnge deiin áreket etip keledi. Bul sheshimder qabyldaýdy kúrdelendiredi, sany kóp ákimshilik-basqarýshylyq personaldy ustaý úshin eleýli qarjy resýrstaryn talap etedi. Basqarý deńgeilerin qysqartý qajet, – dedi Memleket basshysy.
Qazaqstan Prezidenti sondai-aq Qordyń aktivterin jekeshelendirý jónindegi jumysty jalǵastyrýdyń mańyzdylyǵyna nazar aýdaryp, bul baǵdarlamaǵa sheteldik investorlar zor qyzyǵýshylyq tanytyp otyrǵanyn aitty.
Nursultan Nazarbaev Qor kompaniialaryn tsifrlandyrý úderisine arnaiy toqtalyp, tórtinshi ónerkásiptik revoliýtsiia jaǵdaiynda bul baǵdarlamanyń ózektiligin jáne der kezinde usynylyp otyrǵanyn atap ótti.
Budan bólek, Memleket basshysy Qordyń iri investitsiialyq jobalaryna qatysty júieli sheshim qabyldaý qajettigin aitty.
Jiyn sońynda Qazaqstan Prezidenti «Samuryq-Qazyna» aktsionerlik qoǵamynyń 2018-2028 jyldarǵa arnalǵan jańarǵan Damý strategiiasyn jáne Qordy transformatsiialaý baǵdarlamasyn maquldap, onyń ári qarai júzege asyrylýyn erekshe baqylaýǵa alýdy tapsyrdy.
– Ulttyq ál-aýqat qorynyń jumysy qazaqstandyqtardyń turmysyn jaqsartýǵa jáne el ekonomikasyn kóterýge baǵyttalýy kerek. Damýdyń jańa strategiiasy men Transformatsiialaý baǵdarlamasy Qor jumysynyń tiimdiligin arttyryp qana qoimai, ulttyq ekonomikanyń odan ári damýyna da yqpal etedi. Osyǵan orai Úkimet Qor basshylyǵymen birlesip, osy baǵdarlamalardy júzege asyrý baǵytynda belsendi jumys júrgizýi qajet, – dedi Elbasy.
