Nursultan Nazarbaev Resei Prezidenti Vladimir Pýtinmen kezdesti.
Kezdesý barysynda Joǵary Eýraziia ekonomikalyq keńesiniń Qurmetti tóraǵasy Qazaqstan-Resei yntymaqtastyǵy burynnan memleketaralyq qatynastyń jarqyn úlgisi ekenin atap ótti, dep habarlaidy Elbasynyń baspasóz qyzmeti.
– Bizdiń bailanysymyzdyń tarihy, iaǵni Qazaqstan men Resei arasyndaǵy qarym-qatynas – turaqty ári memleketaralyq qatynastyń úlgisi bolyp sanalady. Men budan bylai da osy baǵytty ustana beremin, – dedi Tuńǵysh Prezident.
Nursultan Nazarbaev Resei Prezidentine pandemiia kezinde Qazaqstanǵa kórsetip jatqan qoldaýy úshin rizashylyǵyn bildirip, Qaraǵandy farmatsevtikalyq zaýytynda reseilik vaktsina shyǵarý aiasyndaǵy tiimdi áriptestiktiń jaiyna toqtaldy.
Vladimir Pýtin koronavirýs pandemiiasynyń teris áserine qaramastan ekijaqty bailanys oń qarqyn alyp otyrǵanyn atap ótti.
– Sizdiń arqańyzda Resei men Qazaqstan arasyndaǵy qarym-qatynastyń damý qarqyny bolashaqqa senimmen qaraýymyzǵa múmkindik beredi. Pandemiia saldarynan taýar ainalymy 4 nemese 5 paiyz tómendegenine qaramastan, biylǵy jyldyń alǵashqy jartysynda 20 paiyzǵa jýyq ósim baiqalyp otyr. Bul ózge baǵyttar boiynsha da bizdiń qarym-qatynasymyz óte jaqsy damitynyn kórsetedi, – dedi Vladimir Pýtin.
