نۇرسۇلتان نازارباەۆ رەسەي پرەزيدەنتٸ ۆلاديمير پۋتينمەن كەزدەستٸ.
كەزدەسۋ بارىسىندا جوعارى ەۋرازييا ەكونوميكالىق كەڭەسٸنٸڭ قۇرمەتتٸ تٶراعاسى قازاقستان-رەسەي ىنتىماقتاستىعى بۇرىننان مەملەكەتارالىق قاتىناستىڭ جارقىن ٷلگٸسٸ ەكەنٸن اتاپ ٶتتٸ, دەپ حابارلايدى ەلباسىنىڭ باسپاسٶز قىزمەتٸ.
– بٸزدٸڭ بايلانىسىمىزدىڭ تاريحى, ياعني قازاقستان مەن رەسەي اراسىنداعى قارىم-قاتىناس – تۇراقتى ەرٸ مەملەكەتارالىق قاتىناستىڭ ٷلگٸسٸ بولىپ سانالادى. مەن بۇدان بىلاي دا وسى باعىتتى ۇستانا بەرەمٸن, – دەدٸ تۇڭعىش پرەزيدەنت.
نۇرسۇلتان نازارباەۆ رەسەي پرەزيدەنتٸنە پاندەمييا كەزٸندە قازاقستانعا كٶرسەتٸپ جاتقان قولداۋى ٷشٸن ريزاشىلىعىن بٸلدٸرٸپ, قاراعاندى فارماتسەۆتيكالىق زاۋىتىندا رەسەيلٸك ۆاكتسينا شىعارۋ اياسىنداعى تيٸمدٸ ەرٸپتەستٸكتٸڭ جايىنا توقتالدى.
ۆلاديمير پۋتين كوروناۆيرۋس پاندەميياسىنىڭ تەرٸس ەسەرٸنە قاراماستان ەكٸجاقتى بايلانىس وڭ قارقىن الىپ وتىرعانىن اتاپ ٶتتٸ.
– سٸزدٸڭ ارقاڭىزدا رەسەي مەن قازاقستان اراسىنداعى قارىم-قاتىناستىڭ دامۋ قارقىنى بولاشاققا سەنٸممەن قاراۋىمىزعا مٷمكٸندٸك بەرەدٸ. پاندەمييا سالدارىنان تاۋار اينالىمى 4 نەمەسە 5 پايىز تٶمەندەگەنٸنە قاراماستان, بيىلعى جىلدىڭ العاشقى جارتىسىندا 20 پايىزعا جۋىق ٶسٸم بايقالىپ وتىر. بۇل ٶزگە باعىتتار بويىنشا دا بٸزدٸڭ قارىم-قاتىناسىمىز ٶتە جاقسى داميتىنىن كٶرسەتەدٸ, – دەدٸ ۆلاديمير پۋتين.
