Memleket basshysy Nursultan Nazarbaev Resei Federatsiiasynyń Prezidenti Vladimir Pýtinmen kezdesti, dep habarlaidy "Ult aqparat" Aqordaǵa silteme jasap.
Nursultan Nazarbaev kezdesý barysynda Vladimir Pýtindi Resei Federatsiiasynyń Prezidenti bolyp sailanýymen taǵy da quttyqtap, jaýapty qyzmetine tabys tiledi.
– Biylǵy 18 naýryzda tarihi mańyzy bar oqiǵa boldy. Siz Resei halqynyń asqaq senimin ielenip, zor jeńiske jettińiz. Qazirgidei kúrdeli jaǵdaida mundai senimniń máni zor, – dedi Qazaqstan Prezidenti.
Nursultan Nazarbaev Qazaqstan men Resei arasyndaǵy saýda-ekonomikalyq, investitsiialyq jáne basqa da mańyzdy salalar men baǵyttar boiynsha eki jaqty dostyq pen tyǵyz yntymaqtastyq ornyqqanyna toqtaldy.
– Qazaqstan – Reseimen úlgi bolarlyq qarym-qatynas jáne qarqyndy ekonomikalyq bailanys ornatqan eń jaqyn memleket. Elderimiz arasyndaǵy taýar ainalymynyń kólemi – 16 milliard dollarǵa jýyq. Birlesken kásiporyndar sany artyp keledi, – dedi Qazaqstan Prezidenti.
Sonymen qatar, Memleket basshysy eki el arasyndaǵy joǵary deńgeidegi ózara yqpaldastyq Qazaqstan-Resei qatynastarynda týyndaityn máselelerdi tiimdi sheshýge septigin tigizip otyrǵanyn aitty.
– Qazaqstan árdaiym sizdermen birge. Biz árqashan birge jumys júrgizip, birlese alǵa umtylyp, bul kúrdeli kezeńdi de eńseretin bolamyz. Búginde barlyq baǵyt boiynsha qalypty jumys júrgizilýde. Kórshiles táýelsiz memleketter arasynda árdaiym máseleler týyndap jatady. Bizdiń úkimetterimiz ben ministrlikterimiz arasynda tyǵyz qarym-qatynas ornyqqan. Týyndaityn máselelerdi dúrliktirmei, baisaldylyqpen sheshý qajet. Biz – odaqtas eldermiz, eki eldiń buqaralyq aqparat quraldary da osy baǵytta jumys júrgizýge tiis, – dedi Nursultan Nazarbaev.
Resei Federatsiiasynyń Prezidenti eki memleket arasyndaǵy túrli salalar boiynsha ózara tiimdi qarym-qatynas ornyqqanyn aityp, onyń oń qarqynmen damyp kele jatqanyna toqtaldy.
Vladimir Pýtin Qazaqstan Reseidiń strategiialyq odaqtasy ǵana emes, sondai-aq eń jaqyn ekonomikalyq seriktesteriniń biri ekenin atap ótti.
– Elderimiz arasyndaǵy qatynastar tabysty ári dáiekti damyp keledi. Byltyr ekonomikada jaqsy nátijege qol jetkizdik. Atap aitqanda, taýar ainalymy 30 paiyzǵa ósti. Resei Qazaqstannyń jetekshi saýda-ekonomikalyq seriktesteriniń biri bolyp qala bermek. Reseidiń Qazaqstan ekonomikasyna bólgen tikelei investitsiiasynyń kólemi artqanyn da atap ótkim keledi, – dedi Vladimir Pýtin.
