Memleket basshysy Nursultan Nazarbaev Vladimir Pýtinge Resei Federatsiiasynyń Prezidenti laýazymyna qaita sailanýyna bailanysty quttyqtaý jedelhatyn joldady, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy Qazaqstan halqynyń jáne jeke óziniń atynan Vladimir Pýtindi Resei Federatsiiasynyń Prezidenti laýazymyna sailanýymen quttyqtady.
Nursultan Nazarbaev sailaýdaǵy aiqyn jeńis Vladimir Pýtinniń óz elin damytýǵa jáne onyń ulttyq múddelerin ilgeriletý isine qosqan zor úlesin Resei halqynyń taǵy da joǵary baǵalaǵanynyń dáleli bolyp sanalatynyn atap ótti.
«Sizdiń tiimdi basshylyǵyńyzdyń arqasynda Resei aýqymdy saiasi jáne ekonomikalyq reformalar júrgizý, halyqtyń áleýmettik ál-aýqatyn arttyrý, jahandyq jáne óńirlik ózekti problemalardy sheshý arqyly senimdi túrde alǵa basyp keledi.
Elderimiz arasyndaǵy strategiialyq seriktestik pen odaqtastyqtyń jarqyn mysaly bolyp otyrǵan dástúrli dostyq pen tatý kórshilik qatynastardy damytý isine qosqan Sizdiń jeke úlesińizdi erekshe atap ótkim keledi.
Qazaqstan eki el halyqtarynyń múddesi úshin Reseimen ekijaqty formatta da, Eýraziialyq ekonomikalyq odaq aiasynda da bailanystardy keńeitý isin jalǵastyrýdy kózdep otyr.
Men senim men ózara túsinistikke negizdelgen dostyǵymyzdy qadirleimin ári ony joǵary baǵalaimyn.
Bizdiń birlesken jumysymyz aldaǵy ýaqytta da kópqyrly yntymaqtastyǵymyzdyń barlyq máseleleri boiynsha Astana men Máskeýdiń tabysty dialogynyń berik negizi bolyp qala beretinine senimdimin», - delingen jedelhatta.
Nursultan Nazarbaev Vladimir Pýtinge zor densaýlyq, amandyq jáne jaýapty memlekettik qyzmette jańa jetistikter, al dostas Resei halqyna beibitshilik pen baq-bereke tiledi.
Eske salaiyq, jeksenbi, 18 naýryz kúni Resei Federatsiiasynda prezidenttik sailaý ótti. Ortalyq sailaý komissiiasynyń aldyn ala málimetteri boiynsha, RF is basyndaǵy prezidenti Vladimir Pýtin prezident sailaýynda alda keledi. Ýchaskelik sailaý komissiialarynyń qorytyndy hattamalarynyń 90% óńdelip, sailaýshylardyń 76,41% Vladimir Pýtinge daýys bergendigi málim bolyp otyr.
