Memleket basshysynyń tóraǵalyǵymen ishki ister organdarynyń qyzmetin jańǵyrtý máselelerine arnalǵan keńes ótti, dep habarlaidy "Ult aqparat" Aqordaǵa silteme jasap.
Jiyndy ashqan Qazaqstan Prezidenti quqyqtyq tártipti qamtamasyz etý jáne qylmysqa qarsy kúres júrgizý máselelerin qatań baqylaýda ustap otyrǵanyn aitty.
Nursultan Nazarbaev ishki ister organdarynyń kúsh jumyldyrýynyń arqasynda sońǵy úsh jylda qylmys deńgeii 17,5 paiyzǵa azaiǵanyn atap ótti.
– Adamdar qylmystyq áreketten qorǵaný úshin, eń aldymen, politsiiaǵa barady. Táýelsizdik jyldary 779 politsiia qyzmetkeri qaza taýyp, eki jarym myńǵa jýyǵy jaraqat aldy. Muny esten shyǵarmaý kerek. Sonymen qatar, ishki ister organdarynyń qazirgi jaǵdaiy qoǵam talabyna tolyq jaýap bere almai otyr, – dedi Elbasy.
Memleket basshysy politseilerdiń azamattarmen ózara qarym-qatynasynyń qazirgi standarttary eskirgenin ári zaman talabyna sai kelmeitinin atap ótti.
– Ishki ister organdarynyń jumysy qoǵam kútken senimdi tolyq aqtai almai otyr, azamattardyń kóńil tolmastyǵyn týǵyzýda. Adamdar ózderin qaýipsiz sezine almaidy. Biz onsyz basty baǵdarymyz sanalatyn qazaqstandyqtardyń joǵary sapaly ómir súrýin qamtamasyz ete almaimyz. Sondyqtan, politsiiany reformalaý isine shuǵyl kirisýimiz qajet, – dedi Qazaqstan Prezidenti.
Nursultan Nazarbaev biylǵy Joldaýdyń baǵyttaryna sai ishki ister salasynda mazmundy ári sapaly ózgerister jasaý qajettigine toqtaldy.
Otyrys barysynda kún tártibine sáikes Prezident Ákimshiliginiń Basshysy Á.Isekeshev pen Ishki ister ministri Q.Qasymov baiandama jasady.
Elbasy berilgen málimetterdi nazarǵa alyp, josparlanǵan barlyq is-sharany muqiiat pysyqtaý qajet ekenin aitty.
Memleket basshysy jańǵyrtýdyń mańyzdylyǵyna toqtalyp, ishki ister organdarynyń qurylymy men shtatyn ońtailandyrýdy, sondai-aq ózine tán emes fýnktsiialardy alyp tastaýdy tapsyrdy.
– Artyq nárseniń bárinen arylyp, qylmyspen kúres júrgizý jáne quqyqtyq tártipti saqtaý isine mán berý kerek. Qurylymdar ońtailandyrylady. Sonyń nátijesinde bir basshynyń qaramaǵynda úsheý emes, bes adam bolady.
Shtat sany 10 paiyzǵa qysqarady. Osy sharalar politseiler sanynyń 100 myń adamǵa shaqqanda 471 politseiden kelýin 424-ke deiin tómendetýge jol ashty. Bul eýropalyq ortasha deńgeige sáikes keledi. Osyǵan orai, 16 milliard teńge únemdelmek, – dedi Qazaqstan Prezidenti.
Nursultan Nazarbaev únemdelgen qarajatty qyzmetkerlerdiń eńbekaqysy men áleýmettik qamtý júiesin jaqsartýǵa jumsaýdy tapsyrdy. Elbasy qosymsha ishki rezervterdi izdeý jáne tiimsiz ákimshilik shyǵyndardy boldyrmaý jóninde júieli jumys júrgizý qajettigin de aitty.
– Politseilerdiń jalaqysyn arttyrýǵa qosymsha 21,4 milliard teńge bólinetin bolady. Munyń bári – halyqtyń aqshasy. Politsiiany, armiiany jáne sottardy salyq tóleýshilerdiń qarajaty esebinen ustap otyrmyz. Sondyqtan, azamattarymyz quqyq qorǵaý organdarynyń óz mindetin minsiz atqarýyn talap etedi, – dedi Memleket basshysy.
Qazaqstan Prezidenti qylmysqa qarsy kúres júrgizetin jáne qoǵamdyq tártipti saqtaý isimen tikelei ainalysatyn qyzmetkerlerdiń turǵyn úi máselelerin sheshý úshin qabyldanǵan sharalarǵa da toqtaldy. Bul sharalar politsiia jumysynyń eń mańyzdy degen baǵyttaryna bilikti jańa kadrlardy tartýǵa, sondai-aq, qoǵamdyq tártipti kúzetetin jáne qylmysqa qarsy kúres júrgizý qyzmetin atqaratyn bólimshelerdi kúsheitýge múmkindik beredi.
Elbasy politsiia qyzmetkeriniń teris qylyq jasaǵany úshin ishki ister organdaryndaǵy qyzmetinen bosatylyp, barlyq jeńildikten aiyrylatynyn aitty.
– Bizge jańa formatsiianyń politseileri qajet. Kadrlardy irikteý, daiarlaý jáne ilgeriletý júiesi qaita qarastyrylatyn bolady. Vedomstvolyq bilim berý isi aitarlyqtai ózgeredi. Mamandardy daiarlaý sapasy álemdik standarttarǵa sai keletin zamanaýi politsiia akademiialary qajet, – dedi Memleket basshysy.
Qazaqstan Prezidenti Ishki ister ministrligine tiesili 12 oqý ornynyń úzdik beseýi ǵana qalatynyn aityp, oǵan joǵary jalaqy tólenetin meilinshe bilikti oqytýshylar iriktelip alynatynyn atap ótti.
– Qazirgi politseilerdi kezekten tys attestatsiia kútip tur. Zamanaýi standarttarǵa sai keletin qyzmetkerler ǵana qalady. Osy synaqtan ótpegenderdiń ornyna laiyqty qyzmetkerlerdi alý kerek. Qazaqstanda irikteýdi sapaly júrgizýge zor múmkindikter bar – jyl saiyn elimizdiń joǵary oqý oryndary 20 myńnan astam zańger daiyndap shyǵarýda, – dedi Elbasy.
Sondai-aq, Memleket basshysy ishki ister organdarynan jumystyń servistik modeline kóshýdi talap etti.
– Jyl saiyn politsiiaǵa 4,5 millionnan astam azamat shaǵymdanady, al olardy qabyldaý úshin jaǵdai jasalmaǵan. Eger basyna is túsken adam kelse, ony tezirek ári sypaiylyqpen qabyldaý kerek. Biraq bul – biter istiń jartysy ǵana. Onyń problemasyn shuǵyl ári zańǵa sáikes qarastyrý qajet. Halyqpen jumys isteýdiń zamanaýi formaty degenimiz osy, – dedi Qazaqstan Prezidenti.
Nursultan Nazarbaev jumys kestesi yńǵaily, sondai-aq jaily, tehnikalyq turǵydan jaqsy jaraqtandyrylǵan front-keńseler qurýdy tapsyrdy.
– Qyzmetkerlerdiń jumysynda dórekilik pen mensinbeýshilik bolmaýǵa tiis. Bireý qylmystyń qurbany bolsa, nemese oǵan sondai bir qaýip tónse, ol qaýipsizdikti sezinbeiinshe, jaily ómir súrip, jumys istei almaidy, – dedi Elbasy.
Sonymen birge, Qazaqstan Prezidenti politsiia qyzmetin baǵalaýdyń jańa kriteriilerin engizýdi tapsyrdy.
– Kriteriiler shynaiy ári tekseriletin bolýǵa tiis, sondai-aq onda politsiia jumysynyń sapaly oryndalýy men osy jumystardyń tiimdiligine halyqtyń baǵa berýi kórinis tabýy kerek. Bul úshin memlekettik organdardyń statistikalyq málimetterimen qatar, áleýmettik zertteýlerdi de paidalaný qajet. Azamattardyń senimi, jaily turmysy men qaýipsizdigi politsiianyń tiimdiligin baǵalaýdyń negizine ainalady. Eseptik kórsetkishterdi arttyrý úshin jumys isteý ótkenniń enshisinde qalýǵa tiis, – dedi Qazaqstan Prezidenti.
Sonymen qatar, Memleket basshysy qoǵamdyq tártipti qamtamasyz etý jónindegi jumysqa tsifrlyq tehnologiiany engizýdiń mańyzdylyǵyna nazar aýdardy.
– Ishki ister organdarynyń jumysyna tsifrlyq tehnologiiany jappai engizý qajet. Joldaýda kórsetilgendei, Qazaqstannyń barlyq qalalary qoǵamdyq qaýipsizdikke monitoring júrgizý júielerimen jabdyqtalady. Turǵyndarmen onlain rejimdegi keri bailanysty jaqsartýǵa múmkindik beretin qyzmet túrleri engiziletin bolady. Zamanaýi tehnologiia politsiia qyzmetiniń barlyq salasyn qamtidy, – dedi Nursultan Nazarbaev.
Qazaqstan Prezidenti tsifrlandyrýdyń sybailas jemqorlyqty azaitýǵa, sondai-aq, basqarý býyndary men shtat sanyn odan ári ońtailandyrýǵa septigin tigizetinin atap ótti.
Memleket basshysy politsiia qyzmetin ǵana emes, sondai-aq Ishki ister ministrliginiń basqa da qurylymdaryn reformalaý qajettigin aitty.
– Qylmystyq-atqarý júiesine de mańyzdy ózgerister engiziletin bolady. Zorlyq-zombylyq jasaǵan qylmyskerler basqa sottalýshylardan bólek ustalady, – dedi Nursultan Nazarbaev.
Elbasy kóshelerdegi jáne basqa da qoǵamdyq oryndardaǵy qylmys deńgeiin meilinshe tómendetý jóninde sharalar qabyldaýdy tapsyrdy.
– Adamdar óz bolashaǵyna alańdamaýǵa, qaýipsizdigi memleket tarapynan qorǵalatynyna senimdi bolýǵa tiis. Azamattardyń jeke basy men múlikteriniń qaýipsizdigin qamtamasyz etýdiń mańyzy zor. Politsiia jumysy tiimdiliginiń negizgi kriteriiiniń máni osynda, – dedi Memleket basshysy.
