Elbasynyń baspasóz hatshysy «Qazaqparat» aqparattyq agenttigine maqala jariialady. Onda Aidos Úkibai Nursultan Nazarbaev pen Vladimir Pýtin kelissózderi jóninde tolyq aqparat bergen, dep habarlaidy "Ult aqparat".
***
30 maýsym kúni Nursultan Nazarbaev Resei Federatsiiasynyń Prezidenti Vladimir Pýtinmen kelissóz júrgizdi. Birneshe saǵatqa sozylǵan kelissóz aitarlyqtai jemisti boldy. Buǵan deiin de atap ótilgenindei, taraptar EAEO aiasyndaǵy integratsiialyq protsesterdiń damý perspektivasyn talqylap, óńirlik qaýipsizdikti qamtamasyz etý boiynsha ózekti máselelerge qatysty pikir almasty.
Atap aitqanda, sońǵy oqiǵalar konteksinde Aýǵanstannyń Ortalyq Aziia memleketterimen shekarasyndaǵy shielenisti jaǵdailar talqylandy. Qazaqstan Respýblikasy Qaýipsizdik Keńesiniń Tóraǵasy osy óńirdegi shielenistiń arta túsýine bailanysty óz alańdaýshylyǵyn bildirdi.
Elbasynyń byltyr koronavirýs infektsiiasynan qalai aiyqqany týraly sózi de BAQ-tyń erekshe qyzyǵýshylyǵyn týdyrdy. Este bolsa, týra sol kezde qarapaiym azamattar arasynda da, osy soqqyny ózderine birinshi qabyldaǵan meditsina qyzmetkerleri arasynda da koronavirýs juqtyrý sharyqtaý shegine jetken edi. Nursultan Nazarbaev jańa qaterge qarsy kúreste qazaqstandyq meditsina qyzmetkerleriniń eren erligin birneshe ret basa aitqan. Elbasy adamzat balasy bul virýsty tek álemdik ǵylymi-meditsinalyq qoǵamdastyqpen tyǵyz kooperatsiia arqyly jáne árkimniń óz densaýlyǵyn saqtaýǵa jaýapty qadam jasai otyryp qana jeńýge bolatynyn árqashan aityp keledi.
Eske sala keteiin, Nursultan Nazarbaevtyń syrqattanǵany týraly aqparat bizdiń eldiń azamattaryn ǵana emes, álemdik qaýymdastyqty da aiaǵynan tik turǵyzdy.
Kóptegen shetel kóshbasshylary óz alańdaýshylyǵyn bildirip, Qazaqstannyń Tuńǵysh Prezidentiniń tez saýyǵyp ketýin tiledi. Nursultan Nazarbaevtyń jaqyn dosy Vladimir Vladimirovich Pýtin tipti Tuńǵysh Prezidentti baqylaityn qazaqstandyq mamandarǵa kómek kórsetý úshin reseilik dárigerlerdi jiberdi.
Elbasy koronavirýs infektsiiasynyń simptomsyz túrimen aýyrǵan bolatyn. Meditsina mamandarynyń keńesteri, usynymdary, sondai-aq Tuńǵysh Prezidenttiń densaýlyq jaǵdaiyn muqiiat baqylaýdyń arqasynda bári jaqsy ótti.
Elbasynyń Resei Federatsiiasyna jumys sapary aiasynda talqylanǵan máseleniń biri Qazaq halqy úshin kieli sanalatyn Kenesary hannyń súiegin izdestirý jáne ony Qazaqstanǵa qaitarý taqyryby boldy. Kelissózder barysynda Nursultan Ábishuly Resei Prezidentinen osy protseske kómek kórsetýin surady. Elbasy qazaqtyń sońǵy hanynyń súiegi óziniń týǵan jerinde jerlenip, rýhynyń tynysh tabýy qazaq halqy úshin asa mańyzdy másele ekenin airyqsha atap ótti. Vladimir Vladimirovich Pýtin Tuńǵysh Prezidentti Resei tarapynyń bul máselede jan-jaqty kómek kórsetetinine sendirdi. Pýtinniń sózine qaraǵanda, artefakt tabylady jáne Qazaqstan halqyna qaitarylady.
Elbasy Keńesshisi – Baspasóz hatshysy A.Úkibai
