Nursultan Nazarbaev «Óskemen titan-magnii kombinaty» aktsionerlik qoǵamynyń basshylyǵymen kezdesti, - dep habarlaidy "Ult aqparat" Aqordaǵa silteme jasap.
Kezdesý barysynda Qazaqstan Prezidenti sońǵy jyldary kásiporynnyń oń nátijelerge qol jetkizip otyrǵanyn atap ótti.
– Memleket tarapynan bastamalardyń bárine jan-jaqty qoldaý kórsetildi. Búginde kombinat meilinshe turaqty jumys istep, damyp kele jatyr. Qoldaǵy málimetke sáikes, byltyr óndiristiń 10 %-ǵa, kiris kóleminiń 20 %-ǵa artqany baiqalady, – dedi Elbasy.
Memleket basshysy sheteldik kompaniialardy tartý arqyly innovatsiialyq jobalardy odan ári iske asyrýdyń qajet ekenine nazar aýdaryp, ol kásiporynnyń ári qarai damýynyń mańyzdy tiregine ainalatynyn aitty.
«Óskemen titan-magnii kombinaty» aktsionerlik qoǵamy direktorlar keńesiniń tóraǵasy S.Geller men kásiporyn prezidenti Á.Mamytova kezdesýge múmkindik jasaǵany úshin Nursultan Nazarbaevqa alǵys bildirdi.
– Siz atap ótken óndiris kóleminiń ósýi áýe-ǵarysh jáne ónerkásip naryqtaryndaǵy jalpy ósimdermen bailanysty boldy. Birlesken kásiporyndar iske qosyldy, jobalyq qýatqa josparly túrde qol jetkizý baiqalýda, – dedi Á.Mamytova.
Qazaqstan Prezidentine sheteldik áriptestermen birlese atqarylyp jatqan jumystar jóninde baiandaldy.
– 2014 jyly Frantsiia úkimetimen birlesip, atom ónerkásibine arnalǵan titan quimalary men buiymdaryn óndiretin ekinshi kásiporynnyń qurylǵanyn eske salǵym keledi. Búginde zaýyt qurylysy aiaqtaldy. Biylǵy 15 qyrkúiekte zaýyttyń ashylý rásimi ótedi, – dedi «Óskemen titan-magnii kombinaty» aktsionerlik qoǵamynyń prezidenti.
Sondai-aq, Á.Mamytova kásiporynnyń ońtústikkoreialyq «POSCO» kompaniiasymen birlesken qyzmeti jóninde aitty.
– Birlesken jobany iske asyrý jáne zamanaýi tehnologiialardy qoldaný Qazaqstan-Koreia kásipornyna álemniń jalpaq titan prokaty naryǵyna shyǵýǵa múmkindik beredi, – dedi Á.Mamytova.
Memleket basshysy «Óskemen titan-magnii kombinaty» aktsionerlik qoǵamynyń jumysymen qurylǵaly beri tanys ekenin aityp, kásiporyndy shikizatpen qamtamasyz etý perspektivasy jóninde surady.
Á.Mamytova quramynda titany bar shikizattar halyqaralyq áýe-ǵarysh standarttaryna sáikes alys shetelderden jetkiziletinin atap ótti.
– Biyl «Óskemen titan-magnii kombinaty» aktsionerlik qoǵamynyń 2022 jylǵa deiingi damý baǵdarlamasy aiasynda ilmenit kontsentratyn óndiretin ekinshi ken baiytý fabrikasynyń qurylysy bastaldy. Qazaqstandyq úlesti arttyrý maqsatymen Úlbi metallýrgiia kombinatynyń mamandarymen birlesip ázirlengen jańa tehnologiialar engizildi, – dep túiindedi Á.Mamytova.
.jpeg)